個人私隱梗係要保障啦，好似你姓乜名乜住响邊一忽，電話號碼係九字頭定係六字尾，唔可以隨隨便便向外洩露㗎，一來怕立心不良嘅賊佬甚至色魔打你主意，二來怕八達通公司之流賣你豬仔。
好似見利忘義嘅八達通出賣港人私隱嗰單醜聞咁吖，受害人數以百萬計，事件揭發先至恍然大悟，哦，難怪咁多無厘頭推銷員失驚無神打電話宣傳九唔搭八嘅垃圾貨色啦！
好嘞，假如你任職公營機構，你嘅開會出席紀錄算唔算係私隱呢？係咪唔可以隨便洩露嘅呢？當然唔算私隱啦，完全係風馬牛不相及嘅兩件事。你嘅高矮肥瘦、三圍尺碼、有冇隆胸就話應該保密啫，公營機構開會出席紀錄涉及公眾利益，你保密等於剝削市民大眾知情權。打個譬喻，莫非立法會議員懶到出汁唔開會應該保密咯喎？
呢嗱，奇就奇在身為公營機構嘅個人資料私隱專員公署居然故作神秘，將公眾利益私有化，打死都唔肯透露開會情況喎。本報記者日前向私隱公署查詢其諮詢委員會各成員嘅出席紀錄，點不知，公署竟然以「委員未有在會議中通過」為由拒絕提供。哈，呢啲係咪叫做矯枉過正？公署保障市民私隱甩甩漏漏吖嘛，呢頭有八達通公司出賣個人資料，嗰頭有大大小小政府部門遺失俗稱「手指」嘅電子記憶卡，所以唔理三七二十一，乜都扮晒叉燒唔講得。
本報記者其後再向公署直屬上司政制及內地事務局查詢，以了解港府對公署拒絕向外披露委員會出席紀錄嘅意見。點不知，怪事又發生，不足兩小時之內公署居然主動聯絡本報記者，表示有更多補充資料可以提供，希望畀多啲時間佢哋準備。不過可惜吖，私隱公署係就係提供咗過去一年共四次會議嘅整體出席率，但係仍然以相同理由「委員未有在會議中通過」，堅拒披露個別委員嘅出席紀錄。
公署嘅所作所為簡直就係將自己嘅個人私隱凌駕於公眾利益之上，難怪監察政府開支團體「107動力」召集人何民傑狠批，作為公營機構嘅私隱公署「無王管」，直斥拒絕提供資料嘅藉口係「荒天下之大謬」。何民傑又話：「佢哋係要保障市民嘅私隱，唔係委員自己嘅私隱呀！況且呢個都係佢哋嘅工作報告啫，點解可以唔公開？」
計功夫茶話齋，私隱公署雖然嚴格而言唔係官方部門，不過一樣沾染濃得化不開嘅官僚習性。古語有云，只許州官放火，不准百姓點燈；家陣就係，只許公署隱瞞，不保百姓私隱。
話時話，私隱公署自從一九九六年成立至今，醜聞未停過，是非未斷過，歷任專員都好似魔咒纏身，小市民靠佢哋保障私隱確係冇乜信心。呢嗱，好似上個月先至就任嘅新專員蔣任宏咁吖，自己任職郵政署署長嘅時候就試過侵犯員工私隱，未就任已經萬箭穿心，人人質疑佢老哥何德何能捍衞香港同胞嘅私人空間小宇宙。
不如咁啦，蔣任宏以後改名叫做「私隱線專員」，任何顛三倒四嘅荒謬行為咪出師有名囉！