東隧飛擒大咬 港府廢過廢柴

呢個政府真係愈來愈跛,愈來愈廢。私營隧道狂加「買路錢」,當局居然束手無策,乜都唔做,睇住市民任人宰割,畀財團住嚟搶,你話成班官員係咪廢過廢柴吖!

呢,港府正諗住推出所謂「紅加東減」方案,紓緩三條過海隧道車流失衡引起嘅塞車問題,點知未出手已先畀人剃眼眉。東區海底隧道申請明年起加價,平均加幅高達四成。嘩,仲狼過華秀隻狗,問你怕未?東隧錄得巨額盈利仲要申請大幅加價,好過分啫!

東隧飛擒大咬,港府竟然扮鵪鶉。運輸及房屋局尋日回應話,會根據條例同有關程序處理東隧加價申請,又話港府就三條隧道流量委託顧問公司做嘅研究,預計今季可以完成喎。

嗱嗱嗱,唔好又攞顧問公司報告嚟敷衍市民,拖延時間喇!提起呢啲無厘頭到極嘅所謂顧問公司研究,功夫茶火都嚟埋。隧道流量失衡問題存在N咁多年,係人都知癥結在於港府無所作為,東、西隧無所顧忌話加就加,紅隧不堪負荷塞到爆炸。三條隧道車流幾多,數字日日有、年年出,使唔使嘥幾百萬公帑請顧問公司研究呀?

據講,顧問公司諗出條「絕世好橋」,話紅隧加價東隧減價可以吸引更多車輛改用東隧,減低紅隧壓力喎。加加減減,小學生都識計,使唔使請顧問公司研究吖又!

最好笑嘅係,「紅加東減」未落實,東隧先下手為強起尾注,吹咩!班高官乜都搵顧問公司研究,自己乜都唔使做,有鑊又唔使孭,係咁,不如索性請顧問公司研究埋今晚食乜餸吖?笨!

話時話,生意佬在商言商,唯利是圖,東、西隧狂加價賺到盡,只要唔違法,大家都吹佢哋唔脹。嗱,東隧上次申請加價遭否決,一怒之下申請仲裁,結果本來加五蚊變咗加夠十蚊添。不過,咁唔等於港府可以袖手旁觀,乜都唔做,其實,分流車輛,紓緩紅隧塞車,辦法唔係冇,關鍵係當局有冇決心去做。

正如立法會議員話齋,東隧加幅難以接受,建議當局回購隧道。其實,本報已經無數次建議港府當機立斷,盡快回購東、西兩隧,一了百了,以免年年都要為隧道加價爭拗不休,可惜當局一直充耳不聞。○八年金融海嘯,資產價格大幅貶值,本來係回購兩隧嘅良機,但當局拖拖拉拉坐失良機,搞到市民今時今日仲要任由財團魚肉,真係豈有此理!

官員話喎,回購兩隧,對方可能會吊高嚟賣,查實呢啲擔心都係多餘嘅。好簡單,如果財團坐地起價,當局大可以威脅喺隔籬開多條新隧道,收費平一大橛,甚至免費開放,私營隧道拍晒烏蠅冇車過,遲早要減價投降喇。

計功夫茶話齋,港府收番東、西兩隧唔止可以一了百了,解決三隧車流失衡、紅隧爆燈嘅難題,長遠嚟計,呢項投資包賺冇蝕,總好過無喇喇使幾百萬公帑搞份「阿媽係女人」嘅所謂研究報告啩?