醫療旅遊固然好 配套措施乜都冇

香港名副其實係一個夢幻樂園,事關萬事萬物如夢似幻。有時你會夢見一個中藥港,有時你會夢見一個鮮花港,有時你會夢見一個時裝中心,有時你會夢見一個漁人碼頭……應有盡有,應無亦有。特區政府冇嘢叻,無中生有最鬼叻,勾畫空中樓閣簡直鬼斧神工。當然啦,發夢還發夢,通常係唔會成為事實嘅,所以乜乜中心物物港十居其九胎死腹中。

好嘞,夢完又來夢過,特區政府又發咗一個春秋大夢。官老爺話喎,要將香港打造成亞洲區內醫療服務樞紐,為境外人士提供醫療旅遊服務,吸引外來客人一邊遊山玩水、一邊藥到病除。

大家聽到醫療旅遊四粒字可能會覺得有些少陌生,不如咁啦,功夫茶提提你,有冇聽過有人去泰國整容呀?有冇聽過有人去韓國隆胸呀?呢啲咪就係其中兩種醫療旅遊項目囉。

世界各地發展迅速嘅醫療旅遊產業真係商機無限㗎,好似印度咁吖,《紐約時報》預計到咗二○一二年,印度醫療旅遊收入將會達到二十三億美元,成為該國經濟第二大推動力。至於全球市場,相信高達一千億美元生意額。

照咁講,香港發展醫療旅遊絕對正確喎,執輸行頭慘過敗家吖嘛,更何況作為香港長期競爭對手嘅新加坡早就起步,當地有一個名聞遐邇嘅醫療中心Mount Elizabeth,位於熱鬧嘅烏節路購物中心,整幢醫護大樓分門別類為顧客提供適切服務。

冇錯,發展醫療旅遊方向係正確嘅,問題係香港手握大權嘅官僚往往眼高手低,做起事上嚟一次又一次虎頭蛇尾。

呢嗱,政府係就係預留咗四幅土地打算興建私家醫院,位置分別係黃竹坑、將軍澳、大嶼山以及大埔,可惜業界擔心,假如四幅土地嘅四間醫院同時落成,人手供應將會非常渴市,隨時會出現高薪挖角潮!

喂喂喂,係人都知香港家陣嘅醫療團隊長期人手不足,尤其係踢晒腳嘅公立醫院,一時話護士劈炮,一時話醫生唔撈,主要係跳槽去私家醫院。萬一新設嘅四間私家醫院真係同一時間招兵買馬開張大吉,弊傢伙咯,遠道而來嘅尊貴遊客可能有醫生睇,之但係土生土長嘅香港人隨時冇人理,唔通你叫香港人扮鬼佬「出口轉內銷」,先飛去美國再以遊客身份返轉頭睇醫生咩!

計功夫茶話齋,如果唔做好配套措施,例如大量培訓醫護人員,醫療旅遊呢個夢發到幾大都係廢嘅。掉轉頭嚟講,假如所有人留喺原有崗位,而醫護人員又冇新血補充,未來四間私家醫院只會係得物無所用嘅空殼,到時你冇理由改變用途做晒骨灰龕場啫!

仲有一家嘢極之荒謬,所謂外來客人好多時候係內地同胞,而內地同胞多以七日旅遊簽證來港,試問短短七日點樣有辦法醫得好一個人呢?醫療旅遊唔係神醫旅遊呀,冇可能飲一啖符水即刻精神爽利。即係話,你唔放寬內地同胞旅遊簽證期限,醫療旅遊又係一場歡喜一場夢。

總而言之,醫療旅遊固然好,配套措施乜都冇,唔想春秋夢碎都唔得啦!