近排最熱門最敏感嘅話題，非「保釣」莫屬。呢，尋日係「九一八事變」紀念日，全國各地都有反日示威，香港亦唔例外。不過，呢次本港保釣活動居然發生一段同老鼠有關嘅小插曲，真係奇聞怪事。
件事係咁嘅，正計劃赴釣魚島宣示主權嘅船隻「釣魚台二號」前日嚟咗班不速之客，呢班不速之客唔係保釣人士，而係三個食環署職員。佢哋話喎，有人投訴船上有老鼠，所以要登船檢查，於是睇咗大約半粒鐘，話發現輕微鼠蹤，唔使再查嘞，結果「贈送」幾隻老鼠籠後，就收隊走人。
咁就奇嘞，本港通街鼠患，食環署職員平時懶懶閒，唔嗲唔吊，點解今次又會咁勤力呢？正如船主話齋，船上有老鼠好平常，其他船家唔會因為咁而投訴，質疑當局查鼠患只係藉口，目的係打壓保釣活動。
話分兩頭講，消除鼠患係食環署職責所在，如果真係收到投訴，派人上船巡查亦無可厚非。問題係，全港有老鼠出沒嘅船睇怕冇一千都有幾百條，食環署咁多船唔查，偏偏要查呢條保釣船，而且又選擇喺呢個反日情緒高漲、民情洶湧嘅敏感時刻登船，真係無厘頭到極。咁嘅做法，好難唔令人產生聯想，唔通船主真係冇講錯，食環署查鼠患係假，打壓保釣活動係真？
查實，食環署滅鼠不力早已淪為國際笑柄，老鼠咬人個案多次發生，已經唔算新聞。今年五月中環畢打里有巨鼠咬傷英國女遊客，更令香港醜到國際揚名。「廣州鼠王」李鏡就事後去過畢打里現場視察，結論係食環署清潔失敗、落藥失敗、監管失敗、跟進失敗、堵截失敗等等，總而言之四個字講晒：滅鼠無方。
仲有，審計署前排批評食環署，本港持牌及持證食肆數字激增，但署方巡查次數不升反跌。食環署監管食肆衞生失職，鼠患有乜理由唔失控呀？食肆衞生對市民健康威脅最大，酒樓餐廳有老鼠唔捉，無喇喇上保釣船捉鼠，到底為乜？
話時話，呢次釣魚島風雲再起，兩岸三地政府反應都有啲怪怪地。嗱，內地同台灣當局對民眾嘅保釣行動暗中打壓，港府唔知係咪想有樣學樣，或者收到柯打做嘢，居然赤膊上陣，可惜功夫未到家，打壓不成反出醜，簡直係自取其辱！
咪話功夫茶唔提醒食環署班官員吖，民意不可欺，眾怒不可犯。姑勿論呢次上船捉鼠係真定係假，家陣群情激憤，眾志成城，敵愾同仇，如果有人與民為敵，企圖打壓保釣活動，老鼠一定捉唔到，到頭嚟變成人人喊打嘅過街老鼠就有份！