提起旅遊巴，睇怕香港人唔多唔少都會有心理陰影，唔知幾時殺出一個冷血槍手，唔知幾時跳出一支特蠢部隊，更加唔知幾時送你一個涼薄總統，笑口噬噬同你講悲劇。勢估唔到，即使唔係菲律賓，搭旅遊巴一樣有恐怖經歷。
尋日喎，大嶼山幾乎上演一幕「樂極生悲人肉叉燒巴」。話說有一部旅遊巴行駛途中，忽然傳出陣陣燶味，然後冒出縷縷黑煙，好彩一個二個乘客落車落得快咋，事關成架車隨即火光熊熊燒呀燒，行慢半步都會遭殃。
點解咁大鑊嘅呢？呢嗱，做人真係要小心為上，萬大事唔可以勉強頂硬上，更加唔應該罔顧警告。根據乘客憶述，成件事係咁嘅，牛頭角一個街坊旅行團去大澳同寶蓮寺遊山玩水，旅遊巴駛到嶼南路迴旋處嘅時候，車尾團友已經聞到燶味，立刻通知司機，你估佢有乜反應吖嗱？司機話喎，冇事嘅。旅遊巴繼續行駛，過咗五公里去到麻埔坪附近，再有團友聞到燶味，再次通知司機，而司機仍然唔醒水，冇停車檢查。旅遊巴行多兩公里之後去到水口村，已經唔係傳出燶味咁簡單，直情係冒煙。到咗呢個時候，司機先至知驚，緊急停車，疏散團友。成架車就喺五十幾位團友見證之下陷於火海，燒到熚熚烞烞好鬼死慘烈！
即係咁，肇事旅遊巴前前後後經過「危險駕駛七公里」，司機喺乘客連番警告之下仍然掉以輕心，好彩最後冇人傷亡啫，萬一唔覺意葬身火海，遊山玩水變咗死亡之旅，邊個填命呀？
唉，其實只要睇番菲律賓人質事件，大家都應該得到一個血的教訓。槍手一次又一次警告殺人，指揮拯救行動嘅頭頭居然一次又一次置若罔聞，有人走去食便飯，有人走去歎咖啡，甚至有人荒謬到叫總統瞓個懶覺先啦。你唔聽警告吖嘛，你麻痹大意吖嘛，你準備不足吖嘛，砰砰砰！砰砰砰！砰砰砰砰砰砰砰！八死七傷，亂七八糟！
當然啦，今次性質截然不同，唔係挾持人質，而係機件故障，不過仍然有共通點，就係危機處理非常失敗。喂，唔係冇人警告過司機喎，咁都仲要一意孤行繼續上路，冇搞出人命真係要去寶蓮寺獻上三炷清香叩謝神恩。
話時話，如果你將成個香港比喻為一架旅遊巴，其實前途同樣凶險萬分，因為負責開車嘅司機大佬一向都係撞聾，硬係唔聽人警告。人哋話，冒煙喇，佢唔聽；人哋話，火燭喇，佢唔聽；人哋話，撞車喇，佢敢膽死話你危言聳聽。
最近大家係咪聽到好多「仇富情意結」？仇富呢家嘢可大可小，古今中外社會動亂甚至革命推翻現有政權基本上離不開一個模式：富豪賺到盡，窮人冇飯食，官府話之你，卒之就會有人揭竿起義。
香港家陣有一百萬窮人，就算唔係窮到要瞓天橋底，冇能力置業嘅「在職貧窮」不計其數，理論上前途無可限量嘅八十後亦都怨聲載道，假如仇富情意結愈演愈烈，你估有乜嘢後果吖嗱？罔顧警告必出事，真係會有「人肉叉燒巴」㗎！