晚境淒涼，人人唔想，之但係香港生活指數鬼死咁高，租個豆腐膶單位都要幾千銀，籠屋呎租更加荒謬到貴過豪宅，好多人冇辦法留根香港做一個退休老人，所以咯喎，唔少公公婆婆選擇北上神州安享晚年。
退休返內地本來問題不大，可惜以盛產壽星公出名嘅香港人經常遇到一個兩難局面：長命好啲吖，定係短命好？即係咁，如果你唔使憂柴憂米梗係最好長命百歲啦，不過當你山窮水盡嘅時候，長命未必係祝福，反而可能係詛咒，正如至聖先師孔子話齋，老而不死是為賊也。
嗱，家陣就有一單活生生案例，有一位九十六歲港人婆婆潘煥金，九七年退休返番禺祖家養老，可惜體弱多病兼且積蓄用盡，又冇資格申領香港嘅生果金以及綜援金，無計可施之下惟有回流香港入住老人院。一直協助潘婆婆嘅立法會議員黃國健透露，老人家其實係唔想返香港嘅，無奈人又老錢又冇，回流係唯一出路。所以黃國健就話嘞，如果特區政府能夠放寬生果金離港限制，婆婆就能夠跟隨自己意願，繼續喺內地生活。
乜嘢叫做離港限制？呢個係社會福利署嘅僵化政策，自二○○四年起，綜援申請人必須居港最少七年，以及連續居港最少一年，期間離港日數唔可以多過五十六日。換言之，萬一你唔知乜嘢原因離開香港超過五十六日，等於唔係連續居港一年，你就喪失申領綜援嘅資格。
本來呢，僵化政策已經推翻，高等法院今年六月二十一日裁定，政府規定綜援申請人必須連續居港最少一年係違憲違法，對回流港人存在身份歧視，剝奪佢哋應得權利。之不過咁，社署居然執迷不悟，甚至可以話係擇惡固執，竟然混帳到提出上訴喎！
喂，大佬，高等法院講得好清楚啦，離港限制違憲違法吖嘛，你咪做一個奉公守法好市民，撥亂反正囉，上乜鬼嘢訴？撇開法理唔講吖，回流港人冇資格享用社會福利非常之咁不近人情啫。好話唔好聽，假如社署署長聶德權他日退休之後一個唔覺意窮途潦倒，離鄉別井五十六日流落街頭揸兜乞米，一返到香港居然遇到麻木不仁嘅舊日同僚耍手擰頭唔肯接濟，你話係幾咁淒酸呢？直情係臨老唔過得世呀！
假如功夫茶係聶德權，既然高等法院都有裁決咯，咁咪賣一個順水人情囉，一於放寬離港限制，畀回流港人甚至北上養老嘅公公婆婆都可以領取綜援同生果金。試諗諗，一千幾百生果金喺香港就話冇乜作為啫，喺內地其實已經勉勉強強夠過活。就以潘煥金婆婆為例，每個月一千蚊生果金夠佢留喺番禺繼續養老啦，使鬼頻頻撲撲返香港咩！
所以咯喎，功夫茶懇請法官大人為民請命，一於狠狠扑低社署嘅上訴，等你遺棄老人得咁冷血吖嗱！