洪水滾滾來，家園變澤國，講緊嘅唔係正受洪災蹂躪嘅長江流域，亦唔係颱風「燦都」啱啱登陸嘅粵西地區，而係香港呢個所謂國際大都會。此情此景只有四個字可以形容：匪夷所思！
天文台前日傍晚發出今年首個黑色暴雨警告，全港即時倒瀉籮蟹，水浸同山泥傾瀉報告不斷。受災最嚴重嘅，居然係冇被列入水浸黑點嘅大埔碗窰沙埔仔村。洪水唔止留低滿目瘡痍，令村民斷水斷電，更捲走一名中年男子，屍體尋日至搵番。另外，上水一名行動不便嘅老伯，亦因為大水入屋逃生無門被浸死。
一場黑雨，兩條人命，香港簡直好似落後地區咁，不堪一擊。內地被百年一遇，甚至五百年一遇嘅洪水持續肆虐幾個月，先至會搞到咁狼狽啫，點知香港居然連一場雨都抵擋唔到，認真羞家。
更羞家嘅係，本應用作疏導洪水嘅設施，達唔到防災目的不特止，反而被指係洪水氾濫嘅始作俑者，添煩添亂幫倒忙。有沙埔仔村村民話，喺度居住咗幾十年，從未見過洪水好似今次咁犀利，懷疑同附近嘅河道工程有關，事關多條河道合併，洪水根本無法及時疏導。
渠務署例牌否認，署長劉家強話，事發時有好多大石被沖落河床阻塞主流，令洪水改道喎。言下之意，搞成咁唔關官事，關個天事。嗱嗱嗱，又玩卸膊喇！大石可以改變水流向，小學生都知，問題係，如果當局有足夠防災意識，事先諗辦法阻截大石，甚至化害為利，用石頭防洪，沙埔仔村完全可以逃過一劫。
弊在當局根本冇心，村民○四年已經向民政處查詢工程會唔會令河水氾濫，對方只係回覆話，已經轉介畀渠務署同環保署，之後就泥牛入海冇消息。當局○七年開始喺附近展開河道擴闊工程，依家都未收科，咁拖法，唔水浸至奇啦。
唉，堂堂「國際都會」，香港連第三世界國家都不如，一雨即成災，一災即攞命，唔只係可悲，簡直係可恥。○八年六月一場持續四粒鐘嘅黑雨，曾經奪去兩條人命，估唔到事隔兩年，同樣嘅悲劇再次上演，證明兩年來防洪設施毫無改進，應變救災依然形同虛設，問你驚未。
甩甩漏漏嘅又何止防洪救災吖。有立法會議員懷疑，附近吐露港公路進行緊嘅擴闊工程斬咗唔少樹木，令水土流失，影響河道排水。
查實，政府搞環保同綠化亂晒大龍，毫無章法，早就唔係新聞啦。呢，本報曾多次揭發新界有私人農地被人非法傾倒建築廢料，受害人向當局投訴，警方、環保署、規劃署、地政總署等部門你推我卸，冇一個部門出手阻止，業主只能眼白白睇住農地變成堆填區。近排西貢大浪西灣有人大興土木，掘地斬樹，引起一場大風波，更證明當局所謂環保綠化根本得個噏字。
講開又講，新界地區有唔少山邊寮屋好似沙埔仔村咁，一有大雨隨時被浸，旨意跛腳鴨政府搞好環保，保護市民，發夢都冇咁早。計功夫茶話齋，官府係靠唔住嘅，求人不如求己，各位住喺新界鄉郊嘅市民，最穩陣都係自備救生衣、救生艇，有事嗰陣自己執生，走得快好世界吖！