茵茵有救喇！茵茵有救喇！足證人間有情，愛心無分疆界！
十個月大女嬰蔡文茵患上罕見嘅先天性單邊肺部發育不全綜合症，頑強搏鬥死神，感動無數讀者。茵茵命懸一線嘅痛苦遭遇經過本報報道，馬上一呼百應引起全城關注，短短幾日之內已有無數讀者查詢，東方日報慈善基金與太陽報愛心基金火速籌得超過四十萬元目標金額手術費，暫時共得善款六十六萬元，令到小寶寶可以踏上希望之旅，前往台灣接受手術治療。功夫茶謹代表茵茵向各位好心人講一句：多謝！功夫茶又謹代表各位好心人向茵茵講一句：加油！
正所謂，一方有難，八方支援，真係一啲都冇講錯。茵茵之所以有機會重燃生命茁壯成長，有賴善長仁翁慷慨解囊，甚至係全世界四方八面獻上祝福，遠至台灣、澳洲以及加拿大亦有人查詢捐款辦法。最令功夫茶動容嘅係，有一位年過七十老人家，每月靠一千元生果金過活，你估佢幾咁古道熱腸吖嗱？佢捐出四百元，只係留低六百元自用！
功夫茶記得耶穌講過，有錢人樂善好施固然情操高尚，但係遠遠不及窮苦人家做善事。試想想，一千元捐出四百元，即係捐咗百分之四十，少啲愛心都做唔到。
其他善長仁翁都好有心，例如有一位鍾先生就話嘞：「四十萬係咪只係手術費？手術之後仲需唔需要其他錢做治療？如果有需要，我都想幫手！」另外又有幾位熱心人士表示，願意為手術費包底。
全城伸出援手拯救茵茵確係一石激起千重浪，國泰航空公司常務總裁史樂山睇過本報報道之後，即刻話願意提供免費機票接載茵茵同家人往返台灣，免費機位仲包括醫療團隊，安排醫療人員從旁協助。原來，呢次係國泰第一次向有需要嘅病人提供免費接載服務，可想而知精靈可愛小茵茵嘅感染力係幾咁驚人。
話時話，點解要去台灣做手術呢？原因係台北榮民總醫院喺呢一方面比較有經驗，榮總醫院兒童部加護中心主任宋文舉強調，同類手術喺台灣已經有五十人成功安裝八十一支金屬架，醫院方面非常有信心。榮總醫院自從一九九八年到今年已經有十二年相關經驗，曾經有一名症狀同茵茵相若嘅小女嬰，左側單肺及嚴重氣管狹窄，接受治療後復原良好。另一名男童接受治療後現已七、八歲，家陣十分活潑健康。
見到咁多好心人為善最樂，難怪茵茵媽咪蔡太話：「原來呢個世界一啲都唔冷漠，到處都充滿愛！」又話：「我要茵茵學識感恩，將來幫助有需要嘅人！」
講到呢度，功夫茶有必要補充一句，死神哥哥，唔該彈開。喺全城善長仁翁無限祝福之下，茵茵一定可以吉人天相，平平安安踏上希望之旅，快快樂樂走完回家之路！容許功夫茶代表各位好心人向茵茵再講多次：加油！