食物中毒呢家嘢可大可小，功夫茶睇過一個古仔，好耐好耐之前有一艘探險船喺北極附近迷失方向，最後全船人員死清光。事後科學鑑證顯示，船員原來係中鉛毒，導致神志不清迷迷糊糊，中間發生過乜嘢事就冇人知嘞，斷估不排除有自相殘殺嘅恐怖經歷。鉛毒嘅源頭又係乜呢？答案係罐頭，事關好耐好耐之前嘅舊式罐頭以含鉛物料封蓋。
今時今日嘅罐頭，理論上係無鉛嘅，不過有可能含有另一種同樣足以導致神志不清嘅物質，就係水銀。內地製造俗稱「白豬仔午餐肉」嘅「長城牌火腿豬肉」被發現銀色顆粒，食物安全中心驗出顆粒係俗稱水銀嘅液態汞。食安中心呼籲市民停止食用，經銷商遠大貿易有限公司同意回收。
嘩！午餐肉含有水銀咁得人驚，邊個咁大整蠱呀？抑或又係黑心奸商害人不淺呀？
喂喂喂，等一等，成件事其實相當騎呢古怪。最初係有人投訴，話幾星期前喺長沙灣青山道一間超市買咗一罐長城牌火腿豬肉，打開罐頭之後發現底部黏附大約十粒銀色物體，後來送交食環署檢驗，跟住食物安全中心就話證實係水銀。換言之，發現有問題嘅樣本係「已經開罐」。
好嘞，如果你係富於求真精神嘅化驗人員，你當然唔會只係化驗一罐咁少，起碼要驗多幾個「尚未開罐」嘅樣本。事實上食物安全中心的而且確再從市場抽取同一品牌不同批次嘅另外十三個樣本化驗。結果係點？全部都冇發現水銀。
嗱，功夫茶雖然唔識乜鬼嘢化學元素，更加唔係化驗人員，不過都可以有一個合乎邏輯嘅合理懷疑：未開罐嘅搵唔到水銀，淨係已開罐嘅搵到水銀，會唔會係「外來因素」呀？
至於經銷商遠大貿易有限公司，佢哋亦都好有意見，認為係疑點重重，董事總經理李歡以「好懸疑」形容成件事。根據佢哋嘅講法，內地廠房事後做過實驗，將水銀放入罐頭再按恒常程序高溫殺菌以及攪拌，結果發現水銀平均混入午餐肉，而唔係好似問題樣本「水銀沉罐底」，更加唔係「粒粒咁完整」。
大家都知，功夫茶向來嫉惡如仇，假如罐頭午餐肉真係含有水銀，天王老祖都冇面畀，一定剷到佢上天花板。之不過今次情況十分奇特，簡直可以話係匪夷所思，食物安全中心居然只係基於一個「已經開罐」嘅單一樣本就實牙實齒呼籲市民停止食用，搞到罐頭回收倒瀉籮蟹，係咪過分兒戲呀？算唔算引起不必要恐慌？
呢嗱嗱嗱，功夫茶唔係叫你隱瞞事實，只係叫你驗清驗楚。家陣食物安全中心唔理三七二十一拉響警鐘，直情就係見到條繩就話係有蛇。
講開又講，不如等功夫茶講多個古仔畀大家聽。古羅馬咪有好多變態暴君嘅，例如以殘酷見稱嘅尼祿，後世科學家認為，尼祿之流其實係中鉛毒，所以搞到精神錯亂。
計功夫茶話齋，不如食物安全中心以至成個食環署，再加上老頂食衞局局長周一嶽，集體走去驗身，睇下有冇中鉛毒導致辦事作風亂七八糟吖嘛！