一向被視作香港人後花園嘅西貢，本來山明水秀風光綺麗，過慣石屎森林刻板生活嘅香港人可以得閒走去享受一下難得嘅寧靜，正所謂吊頸都要抖下氣啦。誰不知香港十大勝景之首嘅大浪西灣居然出現機械怪獸大興土木，又挖地又斬樹又呢樣又嗰樣，嚇到保育人士三魂唔見咗七魄。
從村民手上購買地皮嘅富商業主話喎，計劃喺大浪西灣進行「有機耕種」。可惜吖，眉精眼企嘅市民大眾基本上冇人相信呢支笛，九成又係興建豪宅或者私家遊樂場，總之一人獨霸大浪西。事件最初由傳媒揭發，然後網民齊聲怒吼，短短幾日就有幾萬人力撐「捍衞大浪西灣」。
好嘞，既然民間義憤填膺，特區政府係咪應該介入呀？介入好似係介入，不過陸陸續續揭發一眾高官完全後知後覺，保育政策一塌糊塗。尤其係嗰個環境局局長邱騰華，表現完全不合格，難怪保育人士醒佢兩粒字：超廢。
首先，當傳媒揭發大浪西灣生態環境大受破壞之後，邱局長成個傻瓜一樣，根本唔知發生乜嘢事，連確實地點係邊度都茫無頭緒。然後，邱騰華話現場係私人土地，不過又涉及官地，講咗等於冇講。最離譜嘅係，如果成件事唔係鬧到咁大，竟然冇人發覺施工地盤原來係西灣考古遺址，具備古物研究價值！
喂，既然係西灣考古遺址，政府一早就應該珍而重之啦，冇理由經過一連串土地買賣，再加上沙塵滾滾日日施工，等到民間聲音嗌晒救命先至如夢初醒吖嘛。簡單咁講，口口聲聲話保護生態、保護文物嘅環境局根本就係賈寶玉嘅疏堂親戚「假保育」，由始至終一錯再錯，既漠視生態，又賤視文物，卒之搞出一個大頭佛。
根據○七至○八年度施政報告，所有涉及歷史文物建築包括考古遺址嘅工程，事前必須進行文物影響評估。富豪買地施工有冇進行文物影響評估？功夫茶真係唔知，淨係知道一個事實，假如唔係民間發聲，超廢官僚照例發呆，成個西貢後花園灰飛煙滅睇怕都冇人理。
發展局局長林鄭月娥話喎，稍後會同邱騰華商討如何跟進，對事件暫時不回應。功夫茶想問一問林鄭月娥，不回應嘅真正意思係唔係手足無措不知如何是好？好彩，事件惹起議員關注，立法會環境事務委員會下周三舉行特別會議，要求邱騰華親自解畫，到時真係想見識一下保育不力嘅超廢局長有乜回應。
礙於公眾壓力，富豪業主話就話答應暫時停工，不過環保團體發覺兩部挖泥機竟然繼續開工。俗語有云，逢商必奸，所以環保團體決定如期後日去大浪西灣舉行抗議活動。計功夫茶話齋，咁就啱嘞，一於咬住不放，誓死捍衞香港人嘅後花園！
至於一眾假保育廢官，不如咁啦，睇下有乜補鑊行動，萬一補鑊失敗，掉轉頭咬住不放，甚至乎喝令邱騰華屁股向西，一腳踢向大浪西！