中環出更：陳祖澤豁達喜見後輩出眾
八十後、九十後，成為社會新名詞。年歲往往成為人生負擔，中年危機更令人徬徨。前馬會主席陳祖澤話自己唔後生，享受人生之道就係心境要豁達，後輩做得比自己好，應該戥人高興，因為長江後浪推前浪係必然嘅事。
趙雅芝不老有秘方
由熱心人士組成嘅「40+協會」就帶頭表揚社會一班年過四十嘅政商界名人。40+典範頒獎禮日前喺君悅舉行，而陳祖澤係頒獎禮嘅評審委員會主席，全國政協委員容永祺、立法會議員陳茂波、已轉型做大律師嘅前藝人黃錦燊齊獲獎。四十歲往往被人冠以「老餅」稱號，容永祺就保持一份年輕衝勁。佢自爆日前上廣州睇亞運開幕，睇到興奮之際，逼入人龍尾排隊買首日封，仲輪隊蓋印仔，佢笑言咁大個人從未如此瘋狂過，諗起都覺得好笑。
息影紅星趙雅芝陪伴老公黃錦燊攞獎，趙雅芝年過半百但容顏不老，令卓妮嘖嘖稱奇，秘訣原來係靠做藝人同大律師前曾任職藥劑師嘅老公處方多種維他命丸：「美麗唔懶得，一定要勤保養至得。」趙雅芝透露近年積極學電腦，見到潮物iPad、iPhone等，都會八卦一番，總之唔畀自己out。已貴為大律師嘅黃錦燊都不停挑戰自己，嚟緊將喺中大藥劑學院開班講藥劑法律。
晚宴上，仲有已退出演藝圈嘅歌手蔣麗萍，佢罕有地上台獻唱，美妙歌聲依舊。講起如何喺四十歲後活得更精彩，佢話最緊要懂得細味人生:「我覺得人生未到四十歲，都唔夠功力去體會人生深層意義，所以四十歲先係黃金歲月嘅開始。」