政情：立會查迷債拖到證人失蹤

何鍾泰稱四月底搞掂

迷債小組委員會主席何鍾泰尋日開完閉門會議之後話，下個月至明年一月會完成銀行前線職員嘅取證，然後大約喺明年二月中至四月，着手向雷曼苦主取證，佢仲話明年四月底前一定搞得掂，以便埋首寫報告。

所謂前線職員實情包括分行經理、投資顧問同埋銷售員，聽聞六間迷債分銷銀行中，至少有一間銀行嘅職員已經劈炮唔撈兼不知所終。幸好呢類人為數不多，未至於影響調查，否則迷債小組就有排煩。

其實迷債小組委員會已經查咗兩年，期間金融管理局前總裁任志剛退休，小組委員會本身又有十位委員陸續鬆人，連埋今次失蹤證人，種種都係聆訊太耐造成。難為一眾迷債苦主，仲好有耐性咁喺度苦候查出真相。