濫竽充數嘅古仔聽過未？話說古代齊國有位南郭先生，明明唔識吹竽，居然混咗入齊宣王嘅三百人合奏團，日日扮嘢呃飯食。後來齊湣王繼位，要吹竽手輪流獨奏畀佢聽，南郭先生見冇辦法再呃落去，惟有溜之大吉。
濫竽充數固然好笑，不過咁，如果南郭先生生活喺今日嘅香港，又咁好彩做咗公務員，命運即刻唔同，唔使溜之大吉不特止，仲可能紮埋職，做埋樂團團長都未定。
唔係講笑㗎，睇吓公務員敍用委員會嘅年報，就知濫竽充數嘅大有人在。原來家陣做公僕大把上位機會，有啲職系甚至變咗「粥多僧少」添。呢嗱，有個職級共有三十二個空缺，八十個競逐上位嘅公務員入面，竟然有七十六人連三年試用期都未滿。更離奇嘅係，就算喺所屬職級只做咗一年，同樣有機會長期署任高一級嘅職位，過足「升官」癮，你話呢啲係咪香港版嘅濫竽充數呀。
點解會有咁荒謬嘅事？咪就係因為公務員斷層咯，咪就係因為青黃不接咯。一方面，缺少經驗嘅員工水鬼升城隍，要做自己根本唔勝任嘅工作；另一方面，當局搵唔到人，焗住要晉升一啲就快退休咬長糧嘅官員，扼殺年輕一輩嘅上位機會；而長期署任安排又會造成員工之間嘅矛盾，影響工作，施政唔亂至奇。
講到尾，今日嘅亂象完全係港府當初太短視，缺乏長遠規劃所致。○三年本港經濟低迷，輿論紛紛要求港府同市民共度時艱，當局被迫凍結招聘公僕，直到○七年至恢復請人，但又搞出個「３+３」試用期制度，新人要做夠六年至正式納入公僕編制。事實證明咁做完全係捉蟲，斷層後遺症家陣一一浮現，當局卻完全束手無策。
更弊嘅係，煲呔曾政府施政無能，民望插水，問責制名存實亡，搞到官員士無鬥志，離心離德，愈來愈多資深政務官拒搭沉船，紛紛劈炮唔撈，另謀高就，令公務員青黃不接嘅問題更加惡化。
舊人下堂求去，新人夾硬頂上，港府根本就係趕鴨上架，逼一班既缺乏管理經驗、又冇實戰歷練嘅公僕去做佢哋力所不及嘅工作。結果會係點？求其問個小學生都知道答案啦，到頭來咪又係添煩添亂，搵市民嚟搞！
計功夫茶話齋，港府無端端一年使幾千萬公帑，搵班副局長及政治助理返嚟，唔單止阻住地球轉，仲醜聞不斷。呢班既唔睇得，又唔打得嘅政治新貴，正一係典型嘅南郭先生，連佢哋都穩坐釣魚船，唔使畀人叮走，嗰啲未夠班就焗住上位嘅公僕，又點會覺得自己喺度濫竽充數，搵納稅人笨呀。唉，唔怪得香港回歸十三年，亂足十三年啦，原來成個特區政府根本唔夠班！