提到一個藥字，大家會諗到乜嘢？學生哥濫藥？保濟丸事件？如果你諗到東邪黃藥師，證明你係武俠小說迷。如果你諗到藥師丸博子，睇怕你年紀都唔細。
一個藥字真係可以有好多聯想，譬如話，衞生署食錯藥，而且有可能係過期春藥。唔好以為功夫茶係山草藥噏得就噏，衞生署食錯藥完全係有迹可尋㗎，事關審計署舊年發表報告，狠批衞生署監管藥物不力，立法會政府帳目委員會又擬訂報告，預備瞄準署長林秉恩嘅八月十五發炮，以最嚴厲措辭譴責。連食衞局局長周一嶽都走唔甩，帳委會應該會極度遺憾。
你知啦，藥係唔可以亂食嘅，食錯藥隨時搞出人命，偏偏香港嘅藥物監管制度竟然漏洞多多。就好似震驚全城嘅百年老字號保濟丸咁吖，如果唔係新加坡政府驗出含有違禁成分，香港負責監管嘅衞生署或者到咗今時今日依然呆頭呆腦矇查查。
大家又記唔記得舊年至今爆發嘅一連串藥物事故？有人非法包裝，有人偷工減料，有人魚目混珠，甚至有人夠膽死利用衞生條件好極有限嘅唐樓做山寨藥廠，粒藥未啪落肚已經嚇到你三魂唔見七魄。
審計報告係咁講嘅，政府監管藥物不力，包括多年前已知道不法進口商以轉口證為名在港銷售未註冊藥物，至今未堵塞漏洞。審計報告又指出，舊年上半年有四成批發商以及四成七進出口商，超過一年時間未被巡查。對藥商長期不巡不視，即係衞生署懶得就懶囉。
既然審計署狠批，帳委會理所當然要跟進。聽講，帳委會不能接受周一嶽同埋林秉恩無視藥物監控嘅重要性，十年前藥劑業以及毒藥管理局已經提議修改藥物監管法例，不過當局遲遲未立法。如無意外，帳委會將會批評衞生署就監察藥物安全、回收及警報等措施後知後覺，爆出一連串藥物事故之後先至識得檢討。
唉，你話嘞，如果唔係衞生署食錯藥，點會有咁多問題吖？或者又可以掉番轉頭嚟講，既然監管藥物不力，衞生署自己中招都有可能，一個唔覺意啪咗幾粒過期春藥，卒之暈陀陀搞到一塌糊塗。
所以話啫，功夫茶有必要再一次向大家發出溫馨提示，千祈唔好嫌囉囌。
溫馨提示係咁嘅，記住強身健體延年益壽冇病冇痛，咁就唔使食藥嘞，更加可以避免接續而來嘅一條龍服務，例如開錯刀、輸錯血、割錯胸或者傻傻更更留低一塊手術刀片喺心口。大吉利是講句，萬一閣下成為另一個醫療失誤嘅冤魂，麻煩未完㗎，殮房有可能調亂遺體，墳場有機會撈亂骨頭。買咗骨灰龕未呀？如果未買，咁就慘咯，做住三五七年遊魂野鬼先啦，特區政府遲遲未提供足夠骨灰龕靈位，家陣先至話研究研究再研究。
點都好，祝君好運，身體健康最重要。至於林秉恩，功夫茶有必要都祝佢一句龍精虎猛，事關帳委會一旦發炮狂轟，身子差少少都捱唔住㗎！