一「鐵」激起千重浪，唔知大家點睇舊年風起雲湧嘅高鐵事件，功夫茶就覺得，高鐵事件其實係八十後年輕人滿腔怒火嘅一次總爆發。政府一意孤行吖嘛，政府毀人家園吖嘛，政府好大喜功吖嘛，好，你做初一我做十五，一於包圍立法會反到你反艇！
點解年輕人又會滿腔怒火嘅呢？正所謂，冰凍三尺非一日之寒，可以講得好複雜，寫十篇博士論文都仲得，亦可以講得好簡單，五個字講完：有冤無路訴。
後生仔叫你保留集體回憶，官老爺充耳不聞係都要左拆右拆。後生仔叫你創造就業機會，官老爺乜都唔識做，淨係一年浪費幾千萬高薪禮聘幾個傻更更嘅八國聯軍副局長。後生仔叫你唔好官商勾結，哈，整鬼佢吖，官老爺同發展商夾手夾腳強搶民產。莫講話八十後，即使係七十後、六十後、五十後都嬲到震啦！
浸會大學嘅香港過渡期研究計劃做過一項調查，結果發現今年一月整體有五成四受訪者不滿政府表現，較去年微跌一個百分點，之但係，八十後嘅不滿比率不跌反升，高達五成八，較去年上升八個百分點。
對於香港生活，今年一月整體有三成受訪者感到不滿，較去年上升八個百分點，八十後嘅不滿比率升得更勁，高達兩倍，由去年嘅一成四急升至今年嘅接近四成。
至於講到社會公義問題咯喎，弊傢伙嘞，超過七成受訪青年認為政府嘅政策不公義，接近五成深信抗爭能夠影響港府施政。仲記唔記得高鐵事件期間有人揚言「已準備暴動及流血」？大話夾好彩，最終冇暴動，不過仍然有暴力，警民衝突嗰一幕記憶猶新。喂，超過七成後生仔認為政策不公義，以後抗爭手段難保唔會愈來愈激烈喎，已經試過有人向政務司司長唐英年掟鞋啦，下次掟啲乜東東真係冇人敢講。
浸會大學政治及國際關係學系教授戴高禮就話嘞，時下年輕人覺得無奈及沮喪，如果政府再冇行動紓緩不滿情緒，將會造成社會危機。
怒火升溫嘅八十後之所以不斷上街示威，其實仲有一個原因，就係特區政府欺善怕惡。小市民唔出聲，佢當你冇到，示威者一怒吼，佢即刻腳軟。就好似原汁原味保育上環永利街咁吖，一直誓神劈願話唔拆唔得，點知一見有人嘈，市建局急急轉軚。保育永利街唔係話唔好，不過冇理由毫無準備之下亂耍盲拳吖嘛。
計功夫茶話齋，紓緩不滿情緒萬變不離其宗，先做一個誠懇嘅聆聽者，再做一個切實嘅執行者。齋聽冇用㗎，聽完唔做都係廢嘅。不過有一件事比較頭痛，你知啦，特區高官嘅溝通能力非常有限，高鐵事件之後話就話設立網上對話平台，結果網民一係冇辦法留言，一係留咗言都冇回應。唉，情況不容樂觀！