未入正題之前，首先講一個真實嘅故事畀大家聽吖。功夫茶有一個朋友喎，算得上係半個環保分子，即係凡事都會為地球着想嗰隻，用電慳得就慳，用水愈少愈好，不過又未至於三十幾度都唔肯開冷氣，當然亦都唔會行路返工咁戇居。呢位朋友有一次電腦壞咗，好自然就係進行換腦行動啦，之但係，買過一部新電腦之後，舊電腦點算好呢？
作為半個環保分子，冇理由將舊電腦戾手掉落垃圾桶啫，任得電子廢料送去堆填區污染環境，所以佢就四周圍打聽有冇人回收電腦。左打聽右打聽不得要領，最後直接打電話畀環保署，問一問可以有乜嘢辦法處理。哈，估唔估得到環保署點答吖嗱？佢哋話喎，冇o架，署方冇回收服務o架，你自己再諗諗辦法啦！
呢一個故事冇花冇假，百分百真人真事，反映環保署其實非常之咁唔環保。打個譬喻，有人遇劫，打九九九要求警方處理，差人叔叔冇可能話，冇o架，警方冇捉賊服務o架，你自己再諗諗辦法啦！
好嘞，入正題嘞，功夫茶到底想講乜呢？即係咁，環保署嘅老頂環境局終於有少少承擔，拋出電子廢料回收計劃，考慮立法向市民徵收回收費，諮詢期下月底屆滿。政府最初嘅版本係咁講嘅，參考外國數據，小型電器回收費大約一百元，大型電器每件二百至二百五十元。點不知，立法會環境事務委員會前日再次討論有關計劃嘅時候，環境局副局長潘潔被議員連番追問下第一次透露，估計回收電子廢料嘅平均成本高達四百元，如果政府堅持負責回收、拆解以及除毒嘅處理中心須自負盈虧，市民就要繳交相等費用。
嘩，大嬸，回收電子廢料要繳付四百大元，等於趕客啫！就好似功夫茶嗰一位朋友咁吖，半個環保分子嚟o架咋，唔係愛地球愛到願意傾家蕩產嘅狂熱分子，如果畀佢聽到回收一部舊電腦居然要破財四百元，佢一定戾手掉落垃圾桶。
除咗收費高到趕客，環境局對於電子廢料嘅除毒問題亦都冇清晰答案。議員問佢，香港有冇足夠合資格嘅公司為電子廢料除毒呀？潘潔咿咿哦哦左擰右擰，淨係含糊其詞咁話，當局傾向處理中心提供一條龍服務，由拆解至除毒一併處理，當局會因應需要考慮以土地或其他方式資助業界發展，如果業界冇人做，政府都會做。咁即係點？即係唔知有冇人做囉！
更加搞笑嘅係，潘副局長同時又承認，香港現有相關公司嘅技術未能做到電子廢料完全除毒。咁又即係點？即係就算有人做都未必做得好囉！
唉，堂堂副局長講到傻頭傻腦，難怪立法會議員劉健儀質疑回收計劃最終爛尾。劉議員係咁講嘅：「成個諮詢點收錢就講得好細緻，如何處理收番嚟嘅廢電器就好貧乏。」
唔知大家點睇，功夫茶就覺得香港嘅環保政策好廢，一係乜鬼都唔肯做，一係做到一塌糊塗。算罷啦，睇怕回收電子廢料本身都係一單廢料，鬼叫崇尚空談嘅環保高官由始至終都係廢噏咩！