雙失局長玩死人　路邊孝子好頭痕

呢嗱，你試下去紅磡老龍坑街同必嘉街走一圈吖，你就會發覺滿街滿巷都係子子孫孫，恭恭敬敬喺路邊燒香拜祖先。清明節因乜事幹唔去墳場掃墓，而要做街頭廿四孝？呢個問題正正就係頭痕嘅根源，骨灰龕靈位嚴重缺貨吖嘛，先人骨灰遲遲無法「上樓」，咁咪迫於無奈入住「臨屋」囉。紅磡老龍坑街同必嘉街一帶長生店林立，成為大量骨灰嘅庇護中心。每到祭祖高峰期，孝子賢孫將骨灰從長生店請出嚟，因陋就簡路邊拜祭，拜完再送番入去暫住。呢個咁別樹一幟嘅人文奇景，斷估搵勻全世界都搵唔到。

唉，講來講去又係特區政府不知所謂。你知啦，生老病死人皆有之，人必有一死，死必要一葬，唔知官老爺搞邊科，竟然長期漠視陰宅需求。

陰宅需求到底有幾大呢？條數其實好易計㗎咋，香港係福地吖嘛，既冇戰爭打仗，又冇特大天災，每年死亡人數非常穩定，大概就係四萬幾，撇除小部分選擇海葬或者其他另類方法，九成會火化之後安置骨灰龕。換言之，陰宅需求每年四萬左右。條數易計成咁，即使食衞局局長周一嶽只有小學程度，都冇可能唔知道要每年提供相應嘅骨灰龕靈位啦。好衰唔衰，周局長硬係坐視不理，任由同胞變難胞，一個二個死無安身之地。

政府陰宅供應量固之然係零，私營骨灰龕靈位又點呢？即係咁，冇「公屋」住啫，住「私樓」得唔得呀？呢家嘢更加荒唐怪誕，名副其實「玩死人」。私家陰宅係就係存在，不過大部分都係「非法經營」，因為周局長之流嘅大官小吏由始至終冇諗過發牌規管，私家陰宅面臨清拆危機，死人也迫遷。假如祖先在天有靈，可能會向不肖子孫報夢投訴：衰仔，係咪想我死得唔眼閉？我唔要屈居「黑市危樓」！

講到呢度，功夫茶開始有少少思疑，智商有少少問題嘅周一嶽以為香港人嘅長壽等同長生不死，不死咪唔使怕淪為無家可歸嘅遊魂野鬼囉。難怪各界關注骨灰龕問題聯盟召集人謝世傑幫佢安咗一個新花名：雙失局長。雙失嘅意思本來係失職同塞責，計功夫茶話齋，更加準確嘅解釋係失職同失敗。

由於殯葬問題拖拖拉拉折磨活人與死人，所以有慈善機構睇唔過眼，開始加入骨灰龕市場，屯門青山村不久將來會有一座「思親公園」落成，提供五千個靈位。之不過，講過啦，香港每年死亡人數係四萬幾吖嘛，區區五千個靈位眨下眼就消化晒啦。

講到尾，解決問題嘅神聖任務始終落喺雙失局長身上，一係大量興建公屋陰宅，一係發牌規管私家龕堂，如果唔係，人數愈積愈多嘅路邊孝子話唔定會有衝動上街示威。到時咯喎，全人類披麻戴孝捧住骨灰龕圍攻周一嶽，咁就大吉利是撞鬼咯！