嘩嘩嘩！隔籬又有建築工人遊行請願結果演變成衝突呀！
衝突原因係乜呢？講出嚟一字咁淺，外勞搶飯碗，工人冇飯食，所以就火遮眼做出激烈行為嘞。
係咪熟口熟面呢？冇錯，熟到不能再熟。大家不妨翻開中外歷史，古往今來大大小小暴亂騷動甚至革命嘅原因不外乎冇飯食。好似法國大革命咁吖，乜乜主義物物理想都係次要，最重要係人民冇飯食，再加上瑪麗皇后一句傻更更嘅「何不食蛋糕」，火上澆油徒添民憤，結果法蘭西餓過飢人民合力推翻無能政府，一嘢將皇室成員掟上斷頭台。
得獎電影《歲月神偷》有一句對白，鞋字半邊難；計功夫茶話齋，飯字半邊反。有得食就係飯，冇得食即作反。所以咯喎，肚仔餓永遠係放諸四海而皆準嘅動亂根源。
講咗咁耐，功夫茶其實係想向香港特區政府發出嚴正忠告：無能危害健康！
你知啦，香港表面上繁榮安定，實際上百病叢生，貧窮大軍一百萬，失業人口十六萬，人人飢腸轆轆，個個怒火滾滾。尤其係低下階層工人，無論經濟環境點好，升職加薪一定冇份。立法訂定最低工資咩？失驚無神彈個扮代表議員出嚟話時薪二十蚊，激到全城發憎。
記唔記得不久前發表嘅中大民意調查點樣講？調查不但顯示香港唔係和諧社會，而且有四分之一市民認同激烈抗爭。另外，三成一受訪者認為政府保障勞工權益不合格，三成九覺得照顧低下階層利益不合格。簡而言之，政府施政無能，危害特區健康！
大家唔好以為純屬危言聳聽，百幾萬人認同激烈抗爭的而且確係不容忽視嘅警戒訊號。睇番○七年紮鐵工人爭取加薪上街示威吖，最終演變成塞爆中環交通，癱瘓三粒幾鐘，無可避免又係警民衝突。
事實上，近年勞資糾紛此起彼落，一時話運輸工人發動工潮，一時話航空公司醞釀罷工。更加諷刺嘅係，即使「最佳僱主」同樣不得人心，由政府利用公帑出糧嘅醫護人員都滿腹牢騷，一方面不滿人手不足做到氣咳，另方面抱怨同工不同酬。至於建築工人，有工開本來有飯食，問題係，眼白白睇住自己身水身汗搭建出嚟嘅豪宅屢創癲價，捱一個月未必買得起一呎樓，你都咪話唔心酸。
明白未？歷史係可以不斷重演嘅，只要人民冇得食，加上政府又無能，激烈抗爭必然逐步升級。家陣有建築工人遊行請願演變成衝突，難保香港日後唔會出現工潮演變成暴動。
即係咁，除非曾蔭權政府唔介意學似瑪麗皇后同佢死鬼老公路易十六齊齊送上斷頭台，否則一定要實事實幹解決工人冇飯食嘅深層次矛盾。
吖，順帶一提，一代昏君路易十六有寫日記習慣，不過內容完全同時代脫節，法國大革命期間明明全國動亂，日記上面居然會寫「無事可記」。今時今日嘅曾蔭權，眼見勞工怨氣一觸即爆，唔知又會唔會覺得「無事可記」呢？