考考大家，國家主席胡錦濤嘅英文名係乜？冇錯嘞，就係Hu Jintao。掉番轉頭再考考大家，Hu Jintao嘅中文名係乜？大家可能會話，咪玩啦，咁無聊嘅問題都問得出，當然係胡錦濤啦！
呢嗱嗱嗱，唔好掟蕉柴台，功夫茶問呢個問題絕對唔係無聊，反而非常有聊，絕對值得深思，因為《南華早報》鬧出天大笑話。呢份西頭西腦嘅西報，喺頭版刊登胡錦濤訪問美國嘅新聞圖片，旁邊居然出現咁搞笑嘅圖片說明：Hu Jintao （胡佳）。
點解會出現張冠李戴嘅中英對照？功夫茶諗到兩個可能。第一，《南早》大樹飄零，人才嚴重流失，識字嘅編採人員買少見少，剩番落嚟嘅多數處於半文盲狀態。呢家嘢都有迹可尋o架喇，舊年年尾《南早》重組架構大手裁員，一裁就裁走三十名員工，而且大部分係資深新聞工作者，報章質素少不免會每下愈況。
至於第二個可能，或者唔係識字率太低嘅員工一個唔覺意撞大板，而係故意嘅。你知啦，《南早》一向鬼聲鬼氣鬼話連篇，反中亂港又有，噏得就噏亦有，難保唔係指桑罵槐嘅陰招。大家知唔知胡佳係邊個？就係正在北京服刑嘅維權人士，最近申請保外就醫被拒，《南早》將胡錦濤同胡佳混為一談，好容易令人有無限聯想。其中一個聯想就係，哦，你抹黑國家主席係囚犯！
提到噏得就噏，真係冇冤枉呢個「喃嘸老祖」o架。好似○八年九月咁吖，當時正值金融海嘯鋪天蓋地而來，市場風聲鶴唳，人心極度虛怯，死得佢吖，喃嘸老祖竟然妖言惑眾，發放所謂獨家猛料，聲稱中國銀監會已經指示內地銀行停止向美國金融機構拆借資金，嚇到一個二個金融才俊三魂唔見七魄，擔心情況進一步惡化。好彩，中國銀監會第一時間發表聲明澄清，強烈譴責《南早》未經核實刊登不負責任報道，仲話保留法律追究權利。獨家猛料喎，毒家至真！
另外有一單畸屎更加荒謬絕倫，簡直笑到你噴飯。有一年喎，《南早》老闆郭鶴年應邀同一班香港富豪上京，喃嘸老祖發表一篇「統一特區富豪思想」嘅文章，含沙射影揶揄成班富豪都係北京嘅「走狗」。畀下屬痛踩一腳、侮辱一番嘅郭鶴年怒火中燒不在話下，不過佢嘅反應十分騎呢，唔係以老闆身份閂門打狗，而係以「讀者」身份公開投稿，強烈批評《南早》文章誇大失實。匪夷所思嘅係，喃嘸老祖冇畀呢位獨一無二嘅「讀者」呻兩句就算，反而開火筆戰！
即係咁，假設老闆係啱嘅，即係下屬係錯嘅；如果下屬係啱嘅，即係老闆係錯嘅。總而言之，一係《南早》確係失實，一係老闆真係走狗。你話嘞，笑你唔死算你命硬呀，老友！
《南早》亂噏再亂噏，今次輪到國家主席遭抹黑，不如咁嘞，下次索性作個古仔話毛伯伯訪美，會見奧巴馬，咁咪夠晒譁眾取寵囉！