百年老店生產嘅保濟丸被驗出含致癌物質，連唔少香港人作為看門口嘅招牌藥都出事，市民希望港府盡快完善中藥監管制度，但你有你急到踢晒腳，高官照樣滋油淡定印印腳。
呢單嘢最先喺新加坡嗰邊踢爆，港府知道之後，先至煞有介事係咁意做啲嘢，後知後覺畀人狂炳。不過，衞生署署長林秉恩尋日仲死撐，唔承認當局反應緩慢，又話事件同巡查不足無關。
家陣港府證實，政府化驗所化驗咗一百五十三個保濟丸樣本，有十一個樣本被發現含有致癌禁用西藥「酚酞」同「西布曲明」。問題愈揭愈多，咁當局又打算點改善呀？對唔住，要慢慢嚟。林秉恩話，現時全港大約有五百間中藥廠，要全面推行「良好藥品生產規範」（ＧＭＰ），需要一定時間喎。
搞到咁大鑊，居然又係唔使急，簡直離晒譜。講開真係把幾火，現時註咗冊嘅中成藥有九千幾種，但陪伴咗幾代香港人、過去幾乎家家戶戶必備嘅保濟丸，依家竟然可以連註冊程序都未完成。
試問林秉恩，呢啲係咪後知後覺？係咪監管唔到位？當局仲要市民等幾耐、要衰幾多次至會改變中成藥生產幾乎無王管嘅狀況？十年？二十年？你班高官人工高，醫療福利好，等唔等冇所謂，但好多低收入人士同老人家，因為買唔起貴藥或者幾十年嘅習慣，經常幫襯中醫同服用中成藥，你叫佢哋點等？
咁啱得咁蹺，尋日本港有間大學嘅中藥檢定中心開幕，出席儀式嘅高官話，香港一直係中藥嘅貿易中心，港府將檢測同認證列入「六大優勢產業」，有助提高本地及海外市場對使用中藥嘅信心。
真係吹水唔使抹嘴，連最起碼嘅監管都做到甩甩漏漏，該註冊嘅未註冊，要規範嘅冇規範，仲有乜資格講信心吖。就算香港有優勢，都畀政府搞到買少見少啦。
嗱，最近幾年內地劣貨假貨氾濫成災，甚至搞出人命。內地同胞冇晒信心，紛紛湧落嚟香港購物，當正香港係世外桃源，香港出品，必屬佳品。呢，淨係每年中秋前夕，內地同胞落嚟搶購港產月餅嗰種「墟冚」場面，已經證明香港品牌嘅江湖地位。呢啲咪叫品牌優勢同信心囉。
弊在港府唔識珍惜香港製造呢塊金漆招牌，錯過咗大好商機。嗱，講番中成藥呢筆，香港檢測手段就算有幾先進都嘥氣，如果當局冇監冇管，巡查求求其其，有問題一樣發現唔到；如果無良廠家有心隱瞞，一樣可以冚到密密實實。
呢次保濟丸出事，其實生產商早喺今年一月就發現有問題，但冇通知衞生署。當局直到三月底知道新加坡有回收行動，至下令回收。如果當局監管到位，又點至於搞到香港連回收都收到亂晒大龍呀！
計功夫茶話齋，港府唔好吹乜鬼「六大優勢產業」嘞，如果再唔腳踏實地加強監管，Ｑ嘜遲早變晒Kill嘜，搞到香港品牌優勢冇清光。