「再坐一會，但願能再坐一會；既要別去且盡量盡量逗留，日後亦無悔。」鄺美雲呢首名曲，有機會成為醫管局高官嘅「飲歌」，佢哋可能要日唱夜唱，希望醫護人員可以「再坐一會」。不過咁，如果信佢哋嘅，日後就一定後悔。
公立醫院醫護大量流失，問題愈來愈嚴重。有幾嚴重？嗱，醫管局醫療服務發展委員會文件踢爆，預料未來醫護整體流失率會持續上升，到二○二二至二六年間，流失率平均將高達百分之五點二。睇近啲，到二○一六年，累積醫生短缺將多達二百三十人。
病人愈來愈多，醫生愈來愈少，服務質素愈來愈差，醫管局又有乜嘢對策呢？講起嚟得啖笑。當局只係打算增加彈性，「靈活」處理夠鐘退休醫生嘅留職申請，等醫生盡量「再坐一會」。除此之外，醫管局仲計劃增聘兼職醫生，以及去海外「請槍」等等。
醫管局嘅對策睇落似臨時頂檔多過長遠規劃，冇一樣止到咳。好簡單，唔夠醫生咪增撥資源請多啲囉！醫療服務關乎人命，唔係講玩，請多啲醫生市民絕對唔介意，但係叫退休嘅留低、請兼職再搵埋外援，當局只不過又係玩拖字訣，治標唔治本。
再講，就算請到人，可能連櫈都未坐熱就話唔撈。正如公共醫療醫生協會會長何栢良話齋，公院醫生劈炮唔係因為人工比私院低，而係因為工作環境惡劣，工作量太大，唔少醫生做到出現精神問題，甚至想自殺。
梗係啦，公院醫護人手短缺係老大難問題，但港府一直扮鴕鳥唔肯正視，結果愈拖愈大鑊，家陣十個煲咪話九個蓋呀，連七個蓋都冇。前線醫生就算通宵當更，連半日假都冇得補，做到「得閒死唔得閒病」，唔劈炮至奇喇。
醫生係咁，護士嘅情況亦唔好得去邊。醫管局鬼咁樂觀，話隨着大學及該局培訓嘅護士陸續畢業，預計二○一二年或以後，護士人手唔止夠填補空缺，仲「有突」咁話。嘩，醫管局咁講即係玩數字遊戲啫，佢哋淨係計入職人數嘅增加，但流失嗰啲又計唔計先？
退一步講，就算到時護士人手真係「有突」，但流失嘅多數係資深護士，走嘅係主力，嚟嘅係新丁，兩者嘅經驗根本唔可以相提並論，呢條數又計咗未呀？正如業界人士所講，醫管局任由資深護士流失，慳到嘅錢又唔係用嚟培訓新人，留人措施又得把口，點會有護士肯留低吖！
仲有更得人驚㗎，根據醫管局評估，到二○二六年，本港對專職醫療人手嘅需求會比○八年數字飆升五成半，但係呢段期間專職醫療人手嘅流失率達到百分之二點四至四點四，即係話，醫療人手供不應求情況只會愈來愈嚴重。
普通科缺人，專科更缺人；護士大逃亡，醫生走得更快，咁搞落去公立醫院遲早走清光。咪嘞，市民都係未雨綢繆穩陣啲，得閒睇吓《救命一○一》之類嘅「醫書」，學番一招半式傍身，靠自己，好過靠公立醫院！