星期五，宜告解，路人甲聲稱有一事必須懺悔：神啊，本人貪生怕死，膽量愈來愈細，千祈唔好咁快蒙主寵召，阿們！
大家可能會話，貪生怕死人之常情啫，係人類進化史上不可或缺嘅其中一項本能，其實冇乜大不了。話雖如此，不過一個人如果怕死怕到有得震時冇得瞓，咁就比較頭痕。
之所以怕死，其實係有原因嘅。喂，死咗有冇葬身之地先？死咗係咪安枕無憂先？你知啦，喺香港呢個咁特殊嘅時空之下，在生之時買唔起陽宅，身故之後搵唔到陰宅，做人已經難，做鬼亦唔易，死亡真係愈來愈可怕！
冇辦法，骨灰龕位奇缺，遊魂野鬼排長龍慘過輪候公屋，公營龕位供應量固然等於零，私家龕位又唔排除非法經營，萬一「上樓」之後又要「迫遷」，真係大吉利是做鬼都唔靈！
終於，如夢初醒嘅政府發言人話嘞，食物及衞生局已聯同相關政策局及部門成立專責小組，研究如何進一步增加骨灰龕供應，以及加強保障私營骨灰龕消費者權益，期望今季公布有關措施。
好咯好咯，一天光晒，長期忽視生養死葬嘅特衰政府開始轉衰性。政府發言人又話，會採取各樣可行措施，例如興建或改建大廈為多層式骨灰龕。如情況許可，政府會透過靈活設計加建樓層、加建骨灰龕層數，盡量增加新建龕位數目，而且積極改善外觀布局，加入園林綠化設施等等，盡量釋除居民疑慮不安。
正所謂，遲到總好過冇到，拖拖拉拉拖到今時今日先至研究增加公營骨灰龕，係就係遲到離晒大譜，不過始終係一件好事，應該可以將怕死指數拉低少少。問題係，研究咋噃，好似冇人講過事在必行。政府發言人留低一條軟皮蛇尾巴，強調興建骨灰龕有賴立法會、區議會以及地區居民支持，希望社會各界共同承擔，容許每區都有設施安放骨灰。
嗱嗱嗱，呢啲又係一以貫之嘅標準官腔，大腳傳中一嘢將個波交畀人。有賴立法會、區議會以及地區居民支持吖嘛，意思即係話，所有責任全面攤分，如果冇支持，你死你嘅事，蟻民百姓死無葬身之地與官老爺無關。所以話啫，縮骨神功永遠有用，先一句研究研究，再一句有賴支持，骨灰龕冇貨賣嘅責任卸得一乾二淨。
唉，身後事呢家嘢確係頭痕，莫講話一龕難求，即使畀你有幸覓得心頭好，隨時亦係麻麻煩煩。消委會剛剛先至透露，今年收到三宗有關私人骨灰龕嘅投訴，第一單係事主懷疑龕堂非法經營，第二單係龕堂唔肯畀買家轉名，第三單最離譜，事主畀咗訂金購買兩個龕位，龕堂居然喺冇通知嘅情況之下殺訂，理由係未交尾數。
計功夫茶話齋，類似投訴一定陸續有來，因為官老爺唔知係咪做得虧心事多所以好怕鬼，一向係唔多鍾意沾手殯葬業嘅，龕堂亂七八糟缺乏監管吖嘛，冇投訴搵鬼信！
點都好啦，貪生怕死未必係壞事，小市民為咗買你怕而延年益壽長命百歲，呢種庸官治港嘅副作用都算不幸之中嘅大幸！