求學不是求分數？關於教育高官大張旗鼓戮力宣傳嘅七字真言，功夫茶不予置評，因為基本上評無可評，譬如話，你有冇辦法評論一下「生仔不是生叉燒」吖？今日，功夫茶想同大家研究另外七個字：教學竟是教篤數。
就咁，香港教學工作者原來數口好精o架，為咗催谷學校整體考試合格率，不惜犧牲同學仔嘅切身利益。合格率可以點樣催谷呢？大家唔好以為係傳統嘅地獄式培訓，其實係有一條更加見效嘅捷徑。呢嗱，假如有一百個學生考試，五十個合格，即係合格率百分之五十；假如一百個學生之中，成績好嘅五十個應考，成績差嘅五十個放棄，即係合格率百分之一百。換言之，你只要成功說服成績差嘅學生扯白旗投降，學校整體考試合格率就能夠直線飆升。
呢一招篤數神功唔係功夫茶老作o架，全屬真人真事。位於大埔區嘅中華基督教會馮梁結紀念中學，就有人投訴校方勸喻成績差嘅應屆會考生放棄報考英文或者數學科，最終真係有十幾二十個學生聽教聽話，乖乖退修一科甚至兩科。你知啦，英文同數學係必修科，唔合格已經弊傢伙，考都冇考更加等於自毀前程，冇機會升讀中六或者其他課程。學生跣到一仆一碌，校方將佢哋一腳伸落鬼門關。
因乜事幹要犧牲學生換取校方整體高分？唉，講起嚟又係香港失敗教育制度嘅另一首悲歌。出生率低吖嘛，學生買少見少，學校焗住縮班，本來呢個係推行小班教學嘅機會，哈，教育高官居然話，唔夠學生開班嘅學校就要殺殺殺！身處殺校危機之下，好多學校就絞盡腦汁各出奇謀嘞，終於有人諗到走捷徑催谷會考成績，作為吸引小朋友報讀嘅招徠之術。
國之將亡，必有妖孽，會考將亡，必有詭異。今年係最後一屆中學會考，因為左搖右擺嘅教育制度改來改去之後輪到改為三三四學制，估唔到末代會考生竟然仲要畀學校玩鋪勁。
校方嘅解釋好搞笑，該校副校長話喎：「反正如果考生某科會考攞Ｕ，會考證書中唔會顯示考生曾經考過嗰科。」功夫茶諗起兩句老生常談不過千真萬確嘅說話：爭取未必贏，放棄一定輸。考都未考就臨陣退縮，結果真係會輸到甩褲o架！
講到尾，喺香港讀書確係十分悲哀。你天資聰敏咩？學校可能以為你係頑劣不堪嘅百厭星，九成患咗過度活躍症，隨時將你踢出校。你呆頭呆腦咩？學校更加採取放棄態度，唔係悉心教導，而係預先假設你「反正會考攞Ｕ」，所以唔考好過考，以免拉低平均分。更加可惡嘅係教育局，不斷殺校之餘，連智障學童嘅讀書權利都要褫奪，一過十八歲就話必須離校。即係咁，上層嘅天才學生唔要，下層嘅苦讀學生唔教，香港淨係有一班面目模糊嘅中層學生。
計功夫茶話齋，未來棟樑中庸化，香港勢必邊緣化。