中文大學民意調查發現，只有二成六市民認為香港係一個和諧社會，換言之，香港係一個不和諧社會。更加得人驚嘅係，居然有四分之一受訪者同意激烈方式抗爭。喂喂喂，四分之一即係百幾萬人，一旦集體做出非理性行為，好話唔好聽，暴動都似！
因乜事幹香港人怨聲載道瀕臨爆煲？唔通受到泰國反政府紅衫軍感染？正所謂，家家有本難唸的經，泰國有泰國嘅問題，香港有香港嘅煩惱。計功夫茶話齋，毫無疑問又係官逼民反。你知啦，香港人生性熱愛和平，○三年五十萬人上街示威都可以雁過無痕和平散去，由始至終冇出現類似今時今日曼谷嘅失控亂局，如果唔係逼到埋身忍無可忍，一定唔會考慮激烈方式抗爭。
唉，香港人嘅煩惱就多咯，搵食又煩，買樓又煩，污染又煩，一個唔好彩病魔纏身，煩上加煩。本來呢，香港嘅醫療制度算得上係德政，唔理你係大富翁定係窮光蛋，病人一律得到公立醫院照顧，從來唔會出現冇錢冇得救嘅人間悲劇。可惜吖，回歸之後情況急轉直下，德政逐漸變苛政，先係睇急症要畀錢，然後醫管局好搞唔搞，竟然搞個病人分貴賤嘅「藥物名冊」，變相令到窮人真係冇得救，因為公立醫院唔再提供貴價藥物，有需要一定要畀錢買。
好衰唔衰，特區特衰，政府施政長期失當，資源錯配之下醫療失誤無日無之。早幾日之嘛，瑪嘉烈醫院護士幫三個月大男嬰沖涼，熱辣辣滾水淥到下身甩皮。點解會咁大懵㗎？姑且以一個最善良嘅角度推測，護士工作太忙碌嘞，忙中有錯吖嘛，咁就鑄成彌天大禍。
醫護人員工作太忙碌其實又係公立醫院嘅死症，人手不足固然導致忙中有錯，更加慘情嘅係病人利益受到嚴重剝削。譬如話，你心臟病發急需通波仔手術，醫生或者會同你講，得得得，冇問題，不過要排期輪候喎，輪幾耐呢？半年後吖。唔好以為功夫茶隨口亂噏作古仔，事實上舊年就有一單咁嘅個案，屯門醫院為一位男病人安排半年之後做通波仔手術，病人出院短短十小時心臟病發死亡。唔好唔記得，明愛醫院仲離譜，心臟病發送到門口都冇人救，結果又係一命嗚呼。
即係咁，醫護有醫護嘅難處，病人有病人嘅牢騷，香港成個醫療系統就好似患咗癌症嘅病壞咁，你話民怨點會唔沸騰先？你話社會點會有和諧先？全民健康動力勞永樂醫生講得啱：「醫療係令社會和諧最重要一環，依家民怨沸騰，唔通政府想人抬屍去禮賓府示威？」
歸根究柢講到尾，食衞局同醫管局負有不可推卸嘅責任。香港最大嘅醫療失誤，睇怕就係用咗錯誤嘅人去執掌醫療系統生殺大權。呢嗱，大家嘗試假設一下，當日財爺曾俊華心臟病發，如果醫生同佢講，高官冇優先權㗎，一樣要輪候半年通波仔，你估鬍鬚曾會唔會同意激烈方式抗爭吖嗱？功夫茶同你賭一蚊，一定會！