中國以農立國，擅長睇天做人，但現代人唔使耕田，識得數廿四節氣者少之又少。前民政事務局局長何志平近日埋首寫書，教人認識廿四節氣，目標係趕及書展前面世。
肥平近年瞓身搞國民教育，先後出書介紹香港民間信仰、文化及香港掌故等，呢趟再度添食，仲由地下玩到上天，研究埋中國節氣，前日肥平出席慈善活動，仲大談寫新書之樂。
中國古代重視節氣，將一年分成廿四節氣，方便農夫耕種。今時今日，現代人只知有春夏秋冬，好少人理會節氣為何物，但肥平覺得認識時令交替，對養生之道極有幫助。正所謂「因時而宜，因時而變」，即係人應該隨着自然規律改變，調整作息生活。
肥平舉例話，「穀雨」呢個節氣今年四月二十日已到來，果然雨水漸多，唔到你唔信！