唔講真係唔覺，原來香港嘅中成藥註冊制度已經實施咗接近七年。既然有註冊制度，照道理中成藥應該好似街知巷聞嘅歌仔咁唱：「飲醉食滯，四時感冒，舟車暈浪，屙嘔肚痛，保濟丸，保濟丸，有病唔使怕！」好不幸，原來成個註冊制度竟然似足江湖盛傳嘅攞命靈丹，啪一粒就會含笑半步釘。
百年老字號李眾勝堂保濟丸絕對係香港幾代人嘅集體回憶，唔理你係八十後定係十八後，大寶號一定聽過，小丸子一定吞過，點知忽然之間揩大鑊，被驗出含有嚴重副作用嘅西藥成分「酚酞」同埋「西布曲明」。保濟丸回收事件固然嚇到你冇病都怕怕，仲有一樣嘢更加得人驚，原來成個中成藥制度係千瘡百孔㗎！
呢嗱嗱嗱，本報記者抽查過市面上部分獲發過渡性註冊嘅中成藥，發現幾款產品冇列明製造商以及批次編號等等資料，好明顯違反註冊條件。奇上加奇嘅係，有藥物甚至同時出現三個產地，混亂到呢，不知所謂。
記者鍥而不捨繼續追查，再有含笑半步釘嘅攞命發現，全港三百四十三間過渡性領牌中成藥製造商之中，居然有一成設於住宅大廈，當中有三間匪夷所思地以居屋登記。你知啦，製造藥物嘅地方應該衞生清潔無菌無蟲吖嘛，你喺住宅搭個簡陋不堪嘅山寨藥廠，牙煙唔牙煙啲呀？你唔好同功夫茶講呢啲係香港打不死嘅獅子山下精神，住宅穿膠花就話冇問題啫，住宅製造吞落肚嘅中成藥喎，容乜易食死人呀！
講咗咁耐，大家係咪覺得衞生署監管不力？冇錯嘞，的而且確監管不力，如果唔係，中藥專家唔會話一旦嚴厲巡查，八成藥廠要執笠。之所以會有咁多藥廠執笠，反映嘅係衞生署一直發雞盲。
話時話，曾蔭權也文也武揚言打造六大優勢產業，其中之一係檢測以及認證，仲煞有介事成立檢測和認證局，家陣爆出保濟丸風雲，揭發驗藥系統迹近無人駕駛，呢個優勢產業有冇前途㗎？係「優勢」定係「憂世」先？唔好忘記，檢測和認證局啱啱提交第一份發展藍圖，選定四大服務對象，包括中藥、建築物料、食品以及珠寶。功夫茶想問一問，百年老字號都可以走漏眼，隱蔽式山寨藥廠會唔會輕而易舉暗度陳倉㗎？
唉，唔好怪功夫茶潑冷水，如果話中成藥註冊制度似足含笑半步釘，檢測中藥呢個優勢產業應該就係七步冚包散。喂，註冊制度實施七年都可以潰不成軍，檢測產業剛剛先至話起步，有乜法子唔令人擔心到踎低起身見頭暈先？
點都好啦，頭痛醫頭又好，腳痛醫腳都好，計功夫茶話齋，衞生署同檢測和認證局最緊要通力合作，盡量避免啪一粒頭痛藥變腳痛，啪一粒腳痛藥又變頭痛，咁就功德無量嘞！