哎吔吔！慘慘慘！堂堂國家主席嘅名譽地位原來只值兩吋乘兩吋嘅更正啟事！到底乜嘢事？即係咁，《南華早報》鬧出國際大笑話吖嘛，前日頭版刊登中國國家主席胡錦濤訪問美國嘅新聞圖片，居然出現外國傳媒形容為「編輯最可怕噩夢」嘅超級大烏龍，圖片說明係咁寫嘅：Hu Jintao（胡佳）。
傻嘅都睇得出大錯特錯啦，國家主席冇可能係胡佳，胡錦濤冇可能係囚犯，白紙黑字賴無可賴，呢個貽笑大方嘅錯誤想唔認都唔得。之不過咁，《南華早報》不愧為喃嘸老祖，認錯嘅方法係求求其其蒙混過關，是是但但喺一個唔起眼嘅角落頭刊登兩吋乘兩吋嘅所謂「更正啟事」，內文只有一句，喃喃嘸嘸話道歉喎。
你知啦，更正啟事即係編輯棺材，如果出現喺顯著版位甚至頭版，負責嘅編輯實死冇生，執定包袱返鄉下耕田。照道理講，家陣受害者係當今聖上胡錦濤，矚目範圍遍及全球，連ＣＮＮ都追問：Whose Hu？編輯棺材怕且釘定蓋都得咯。奇怪嘅係，哈，棺材板只係微不足道又毫不起眼嘅兩吋乘兩吋，你話嘞，堂堂國家主席嘅名譽地位係咪全不值錢吖？
喃嘸老祖利用「國家主席胡佳」玩殘領導人，你估佢哋點解釋吖嗱？佢哋話喎，記者、編輯同校對都唔識中文，所以張冠李戴。呢個解釋狗屁不通，首先，如果話報館裏面連一個識中文嘅人都冇，最初因乜事幹要搞中英對照呀？其次，ＣＮＮ都有人識中文啦，否則唔會發現錯處，莫非西方嘅鬼佬熱愛中國文化，反而香港嘅西人全屬漢字文盲？更何況，Hu Jintao有三個發音，點都唔會出現只有兩字嘅胡佳啦。
所以話啫，一定有蠱惑！更正啟事細無可細，砌詞狡辯於理不合，當中分明就係有人故意指桑罵槐，表面上係「編輯最可怕噩夢」，實際上係「《南早》最陰險嘲弄」。當今聖上被抹黑為囚犯，如果係流行文字獄嘅大清王朝，九個頭都唔夠斬，十個族都未夠誅！
不過話時話，喃嘸老祖都算叻仔，識得度出一條絕世好橋以隱晦手法作賤國家領導人，唔似得陰陽先生嘅《明報》同爛果先生嘅《蘋果》，日日歇斯底里大鬧特鬧仍然冇用。呢兩位先生如無意外正在呻笨，潑婦罵街原來係唔會蜚聲國際㗎，早知就學似喃嘸老祖玩陰濕，咁咪一舉成名天下知囉！
喃嘸老祖更加叻仔嘅係，明知二十三條未立法，反中亂港冇人吹得佢脹，所以一於敢作敢為，為賤最樂，福有攸歸。香港實行一國兩制，即係「一個國家，兩種制度」咁解，以前有人執台灣口水尾鼓吹「兩國論」，已經夠晒離奇，點知依家仲絕，居然搞咗個「一國主席，兩個名字」出嚟，喃嘸老祖果然創意無限。
計功夫茶話齋，一向被視為臥虎藏龍嘅香港，根本就係臥狗藏奸，通街遍布走狗漢奸。尤其係鬼聲鬼氣嘅鬼報，陰陽怪氣單單打打乜都做得出，今次玩「國家主席胡佳」，難保下次唔會玩「胡鬧」，再下次咯喎，玩「胡塗」。
點都好啦，臥狗藏奸呢家嘢睇怕都係死症，冇得醫嗰隻。曾蔭權求神拜佛唔好成為下一個受害者，喃嘸老祖以後可能會將Donald Tsang譯做「曾灶財」，唔係讚你做皇帝，只係咒你快升仙！