唉，加加加加加！車費又話加！
港鐵話喎，根據票價可加可減機制，最快可於六月調高車費，平均加幅百分之二點零五。除咗港鐵勢兇夾狼打劫乘客荷包，專線小巴亦都搶錢不甘人後，十一條線已經獲准加價，三十八條線正在申請加價。
你話係咪搵笨吖？嗰個所謂可加可減機制，簡直係荒天下之大謬嘅呃錢方程式。橫睇掂睇，左計右計，搖頭揈髻，最終結果永遠係公共交通機構有權自動加價，硬係未見過減價，一次都冇。
老實講，可加可減話就話有條方程式，但功夫茶真係唔識計，淨係知道三個事實。第一個事實，港鐵舊年狂賺九十六億，完全冇加價壓力，除非一心一意搜刮民脂民膏。第二個事實，統計處公布，去年十二月實質工資下跌百分之零點八，市民收入縮咗水，居然要捱貴車費，好慘啫。第三個事實，喂，兩鐵合併嘅時候講過吖嘛，協同效應會令乘客得益，得條毛咩！
今時今日做一個升斗小市民確係好鬼死悲哀，經濟似乎復甦，遲遲未能受惠，實質工資已經少咗一截，竟然有涼薄議員打死狗講價，建議最低工資時薪二十蚊，一個月捱生捱死賺得仲少過領綜援。嗰個唔知代表邊個嘅張宇人，話就話眾怒難犯樣衰衰一鋪鞠躬道歉啫，可惜時薪二十蚊偉論一出，經已造成無法估計嘅殺傷力。老友，假如再有無良奸商建議時薪二十一蚊，佢已經可以振振有詞咁話，呢啲唔係叫做涼薄，而係叫做豪氣。
港鐵加價會唔會造成骨牌效應？巴士公司今次算係幾乖仔，佢哋話唔會跟大隊加價。之不過咁，唔好怪功夫茶以小人之心度君子之腹，巴士公司應該只係按兵不動，觀察一段時間之後恐怕又會手起刀落。冇辦法，鬼叫票價可加可減機制助紂為虐咩！
今年加風四起，乜乜物物都加價。天星小輪又話加，山頂纜車又話加，煤氣公司又話加，阿貓阿狗淨係識得加加加。再係咁落去，仲有一樣嘢會加，就係濃得化不開嘅民怨。車費可加不減吖嘛，自自然然民怨只升不降。
咦，講下講下，好似講漏咗一種交通工具，亡命小巴加唔加？計功夫茶話齋，亡命小巴肯定加，因為呢種交通工具由始至終無王管，唔跟大隊加價先至奇。
前排之嘛，警方拘捕一個黑社會高層，涉嫌向多條俗稱紅色小巴嘅公共小巴線勒索保護費超過四百萬。拘捕行動再次反映一個公開秘密，維持小巴秩序嘅居然唔係運輸署，而係黑社會。而特區政府又得意喎，明知問題存在，偏偏裝聾扮啞。所以話啫，無王管嘅亡命小巴肯定會成為加價掠水俱樂部嘅會員。
小市民任人魚肉，點算好？唔使教喇啩，禮賓府地址人盡皆知，約個時間去開派對囉！