開講有話，唔怕生壞命，最怕改壞名。代表一個城市嘅標誌亦一樣，如果有理冇理亂改一通，穿鑿附會加埋啲無厘頭嘅「價值觀」，樣衰失禮人事小，唔好彩佗衰埋運勢，咁就真係大吉利是咯。
呢嗱，港府又無喇喇整撻瘌嘞，使咗六百幾萬將「香港品牌」宣傳標誌改頭換面，搞出個唔三唔四嘅縮水版「飛龍」。不過，呢個似龍非龍嘅物體一出街就畀人笑到面黃，真係唔衰攞嚟衰。
表面睇，新標誌沿用舊嘅圖像，但飛龍神韻已蕩然無存。嗱，大細縮咗近半，原有嘅「香港」中文字樣亦冇咗，只係勉強見到「ＨＫ」兩個英文字，咁已經差好遠啦。最攞命嘅係，連「龍眼」都冇埋，得番個窿，當堂冇晒神，學網民話齋，完全「無晒霸氣」。
正一係阿茂整餅，冇嗰樣整嗰樣。係人都知，喜慶舞龍最高潮就係「點睛」嗰下，家陣畫龍冇咗隻眼，仲話條龍係代表香港添，真係多得政府唔少咯。好地地一個城市標誌變咗龍唔似龍嘅「四不像」，但設計費一啲都唔平，要一百四十萬，連埋製作宣傳短片同做民調及諮詢等費用，總數達六百一十萬，你話係咪攞嚟搞吖。有市民話，見到個標誌就把幾火，不如將啲錢派咗佢好過。
另一個敗筆就係，呢個似雞頭多過龍頭嘅新標誌，後面新加咗藍、綠、紅三條綵帶，話係分別代表香港嘅藍天綠地，同獅子山山脊線喎。講真，市民同遊客望住三條飛到亂晒龍嘅綵帶，都唔知睇出啲乜，有人甚至睇成係「沉沒中的獅子山」，認真唔吉利。
查實，「飛龍」標誌自從○一年推出以來一直是非多多。市民第一眼嘅印象就係「非龍非鳳反似雞」，好難令人將佢同香港諗埋一起。前兩年有團體調查發現，九成七受訪外地遊客都唔知呢條「飛龍」代表香港，甚至有人以為係新加坡或者北京奧運嘅標誌。
港府前後使咗二千幾萬公帑設計同推廣「飛龍」，呢次舊貌換新顏使咗六百幾萬，到頭來又係得個吉，市民愈睇愈唔順眼，咁搞法，同揼公帑落鹹水海有乜分別？唔怪得有立法會議員批評新標誌「整色整水」，要追究浪費公帑嘅責任，更有網民要港府回水，還番百幾萬設計費畀納稅人。
咪睇個新標誌樣衰衰，劣評如潮，但當局解畫嗰陣，依然吹到天花龍鳳，天上有地下無。嗱，照財政司司長曾俊華嘅「權威演繹」，新「飛龍」標誌反映咗本港五項「核心價值」，包括自由開放、積極進取、追求卓越、勇於創新及優質生活喎。
簡直就係故弄玄虛，仲有冇牽強啲吖？買豬肉搭豬頭骨就話聽過啫，估唔到呢個畀網民叫做「落荒而逃的雞頭」嘅新標誌，仲搭埋「核心價值」添，買一送五，如果鬍鬚曾明年份財政預算案有咁疏爽，咁就差唔多。