睇病最怕搵着個黃綠醫生，求其開劑藥，病根未除，留低後患，手尾可能仲長。如果政府推行政策學黃綠醫生咁，求求其其，是是但但，撞板事小，禍及市民就事大喇。
私營殘疾人士院舍服務一向冇監冇管，連經營牌照都唔使領，成個行業自生自滅，搞到烏煙瘴氣、亂七八糟。為咗補鑊，當局計劃推行發牌制度，立法規定呢類院舍要符合相關質素及消防安全等要求，至可以攞牌經營。話時話，當局發牌監管私營殘疾人士院舍，係應有之義，問題係，當局做啲唔做啲，淨係要求院舍提高服務質素，但完全冇提供協助或配套措施，正如業界人士話齋，結果只有迫使院舍加價或者結業。
查實，社會福利署四年前曾推出相關計劃，但計劃只屬自願登記性質，當然冇乜人吼喇，全港五十四間私營殘疾人士院舍，至今只得六間參加咁大把。因為服務完全唔受監管，以致質素參差，良莠不齊，虐待院友醜聞愈爆愈多。當局收到嘅幾十單相關投訴入面，涉及問題由一般管理、衞生問題到消防安全及保健護理等乜都有。唉，假如一早立法規管，就唔使搞到立立亂啦。
本來呢，後知後覺總好過冇知冇覺，可惜港府連私營院舍嘅問題根源喺邊都搞唔清楚，一聲發牌就關人個關，證明當局純粹係為咗卸責。
講到尾，殘疾人士院舍服務問題多多，責在港府。由於資源不足，政府資助嘅殘疾人士宿位長期供不應求，輪候時間閒閒地超過十年。私營院舍本來可以解決政府資助宿位不足嘅問題，但由於冇監管、服務差，入住率僅得七成，結果咪愈做愈差囉。
解決方法其實一字咁淺，只要當局增撥資源起多啲資助院舍，或者向私營院舍買多啲宿位就搞掂。至弊當局口爽荷包立，睇番財爺鬍鬚曾最新嗰份財政預算案提出嘅「買位先導計劃」，未來四年向私營院舍增加購買嘅殘疾人士宿位，得三百個咁大把，相對於輪候緊院舍嘅殘疾人士，根本就係杯水車薪。
話時話，好多私營院舍都集中喺新界村屋，設施簡陋，人手不足，院友人數唔符合規定，經常發生疏忽照顧同虐待院友醜聞。講來講去，呢啲都係政府冇監管種落嘅惡果。
發牌制度實施之後，唔少院舍就要按規定減少宿位，增加人手，改善消防安全等設施。呢啲本來係好事，弊在運作成本大幅增加，院友人數減少，院舍未必捱得住，雙重夾擊之下出路只有兩條，一係大幅加價，一係索性執笠。業界估計，最少有兩成院舍可能面臨結業。其實，無論係加價，或者係結業，最受影響嘅，始終都係無依無靠嘅殘疾人士。呢啲問題，當局有冇諗過？又打算點解決呢？
計功夫茶話齋，如果港府淨係識發牌，唔識增撥資源，唔單止唔能夠改善院舍嘅服務質素，甚至可能迫使部分殘疾人士要瞓街添。