政情：幫助弱勢周松崗勒緊荷包

港鐵磨刀霍霍準備六月加價，行政總裁周松崗尋日上立法會解畫，畀成班立法會議員圍住追問係咪可以畀多啲優惠班忠實乘客。向來EQ好高嘅周松崗惟有以笑容擋架，仲搬出商業營運呢條大道理做擋箭牌，猛話港鐵作為上市公司，要向廿六萬名股東交代，即使想做福利事業，都會綁手綁腳。佢仲話現有優惠每年都用咗十一億元，即使希望幫助弱勢社群，都唔可能要一間商業機構完全做晒喎。其實大家唔係要港鐵做晒啲善事，只係想佢做多啲啫。