唉，可惜可惜，呻笨呻笨，如果功夫茶識得拉二胡或者吹嗩吶甚至彈琵琶就好啦，咁就可以申請加入香港中樂團搵番一份筍工。十分不幸，自小家貧書少讀，從來冇研究過唐朝詩人杜牧名句「二十四橋明月夜，玉人何處教吹簫」係何等優美，錯過咗以簫會友投身中樂團嘅機會。
中樂團份工有幾筍呢？唔講真係唔知，原來工作時間非常短，簡直比迷你裙更短。審計署發表最新一份衡工量值審計報告，首次向政府資助嘅中樂團開刀。報告係咁講嘅，中樂團藝術部員工一年平均工作時數為七百零三小時，較規定時數一千二百三十六小時少咗百分之四十三。嗱，計數嘞，當你一周工作五天，一年即係有二百六十個工作天，換言之，中樂團每日工作時數唔夠三粒鐘！
你知啦，香港有好多人日捱夜捱，工時十粒八粒鐘只不過係基本要求，假如你係備受剝削嘅草根階層，時薪二十蚊不特止，隨時有需要連踩十幾二十小時。中樂團每日工作時數唔夠三粒鐘，確係筍到冇朋友。
咁都未算o架，審計報告仲話，中樂團為外訪嘅行政人員提供商務機位，而唔係規定嘅經濟客位；另外，中樂團更為員工提供較規定高級嘅酒店住宿。即係話，工時短，福利高，中樂團優哉游哉利用公帑享受無窮樂趣。
當然啦，如果你係納稅人，你就唔會覺得係樂趣，反而會留低一個好冇癮嘅印象：妖！香港點解咁多食阿公飯嘅團體機構浪費公帑o架！
講到浪費公帑，正正式式食阿公飯嘅政府部門更加係一等一高手。審計報告又指出，○七年已經批評運輸署興建嘅多條行人天橋以及行人隧道使用率偏低，至今情況冇改善。其中一個例子係紅磡繞道一條連接尖東海濱長廊嘅高架行人天橋，全長六百米，造價三千萬，居然長期拍烏蠅，用家大部分係緩跑或者散步人士。
咦咦咦，咪住先，一條天橋造價三千萬？似乎貴得誇張咗少少喎。唉，當初唔識拉二胡，當初唔識起天橋，確係悔不當初呀！
行人天橋少行人，已經搞笑o架啦，原來一山還有一山高，一蛋還有一蛋笨。深水埗有一條連接九江街至一幅公屋用地嘅行人隧道，早於八八年動用一百九十六萬元落成，由始至終冇開放畀市民使用，至今封閉超過二十年，運輸署從來冇跟進。點解會咁嘅呢？大概係，做慣乞兒懶做官，做慣敗官懶得管。所謂敗官，全稱係敗家仔官僚。
家陣審計署連環發炮，中樂團同運輸署會唔會乖乖地撥亂反正呢？計功夫茶話齋，嘥氣啦，審計報告發表過不知幾多份，浪費公帑聽聞過不知幾多次，餐餐都係笑罵由你笑罵，好官我自為之。所以話啫，今次應該都唔會例外，審計由你審計，敗官我自浪費。真係想撥亂反正？試下曾蔭權政府大換班囉！