笨笨笨！今鋪真係要呻笨！簡直笨過「荷蘭銀行支票」嘅英文發音！
乜嘢咁笨呢？呻笨之前，有必要先同大家介紹一個法律概念——逆權侵佔。呢個法律概念係咁嘅，只要你佔用咗某塊土地或者某個物業一段長時間，譬如話十幾二十年，原業主就冇權興訟追討，你可以合法成為正式嘅新業主，呢家嘢就叫做逆權侵佔。之所以會有咁嘅法律概念，原因係防止無窮無盡嘅無謂爭拗。你知啦，任何土地或者物業好耐好耐之前都可能有原本嘅舊業主，難保咸豐年代舊業主嘅子子孫孫唔會同新業主死纏爛打爭奪遺產。所以咯喎，為咗避免口同鼻拗，原業主嘅興訟期係有時限嘅，一般定為十二年，蘇州過後冇艇搭。
好嘞，講完逆權侵佔，輪到喊住呻笨。確係笨到冇朋友㗎，原來政府有三個物業長期丟空，足足養蚊三十年！大家試想想，功夫茶如果三十年前開始逆權侵佔，今時今日已經係三個物業嘅新業主，打跛腳都唔使憂啦！
唉，笨呀！官老爺既然肯做敗家仔，小市民點解唔去攞着數？
三個有等於冇嘅官方物業分別位於北角七海商業中心、西環創業商場以及上環干諾道西一一八號一洲國際商場，早於一九八○年開始陸續丟空。兩年前喎，審計署署長第五十號報告書已經開炮，批評特區政府未有妥善管理呢三個物業。審計報告仲提出過多項建議，例如以商業用途收租、畀非政府組織租用、出租物業外牆展示廣告，或者畀銀行設置提款機等等。以鄰近炮台山港鐵站七海商業中心嘅物業為例吖，有地產界人士估計，月租可達十一萬元。至於創業商場咯喎，位處中西區人流最多地段，月租接近十萬元。粗略推算，三個物業一個月搵銀三十萬，一年就係三百幾萬。換言之，荒廢物業三十年等於浪費公帑差不多一億！
春去秋來事隔兩年嘞，荒廢物業點解繼續荒廢？敗家行為點解堅持敗家？政府產業署係咁講嘅，現有契約及相關法律文件都限制有關政府物業不可改作其他用途，當局會積極研究可行辦法，不過由於涉及多項複雜因素，例如是否符合《建築物條例》規定、大廈公契條款以及樓宇結構等等技術限制，所以暫時未有時間表。
見到咁嘅官僚作風，係人都眼火爆啦，難怪立法會政府帳目委員會副主席陳茂波認為「離晒譜」，直斥產業署應該「打幾棍」。
冇錯，長期浪費公帑嘅產業署確係抵打屁股，摳幾棍完全唔算過分，不過話分兩頭，呢一堆懶骨頭又幾鬼死抵讚。點解咁講呢？俗語有云，寧生敗家仔，莫生蠢鈍郎，全港七百萬市民今鋪蝕晒章，冇人識得走去逆權侵佔據為己有，只係間唔中有少數族裔人士聚集唱歌開派對，顯然就係敗家仔稍勝蠢鈍郎一籌嘅表現，梗係要讚十個叻啦。簡而言之，丟空物業三十年居然寸土不失，同山西王家嶺煤礦先害人再救人一樣，產業署創造偉大奇迹！