吓？活雞屠宰中心好大機會胎死腹中？嘩嘩嘩，呢鋪破紀錄嘞，破咗議而不決嘅全港紀錄。
活雞屠宰中心嘅構思早於一九九八年已經提出，到咗今時今日即係拖拖拉拉十二年，最終都係虎頭蛇尾冇料到。功夫茶記憶所及，其他有頭威冇尾陣嘅乜乜中心物物港，大不了維持十年八載，拖足十二年而一事無成嘅，如無意外係獻世新猷，你話嘞，仲唔係破咗議而不決嘅紀錄？
根據食物及衞生局局長周一嶽嘅講法，成件事係咁嘅。由於爆發禽流感，活雞數量由原本每日六萬隻下降至現時一萬四千隻，只佔市場供應量百分之五，另外三成係冰鮮雞，其餘六成幾都係雪雞。活雞數量既然咁少，加上香港目前採取日日清政策，活雞唔准留過夜，局長要你三更死，不得留雞到五更，所以中央屠宰變得可有可無。
之不過咁，見過鬼怕黑嘅周一嶽大概學精咗，講說話唔敢再講得咁死，依然留番一條能屈能伸嘅尾巴。佢話喎，當局正進行顧問研究，包括檢視控制禽流感水平，以及市民對活雞嘅需求，再決定是否成立活雞屠宰中心。
計功夫茶話齋，唔好再浪費公帑嘞，一於正式宣布活雞屠宰中心計劃壽終正寢，泡湯咪泡湯囉，對於撞板多過食飯嘅特區政府嚟講都唔係第一次o架啦。大家知唔知所謂顧問研究要用幾多錢？一百四十萬呀，雖然唔係大數目，不過留番嚟做最低工資顧問研究冇咁嬲，唔好再畀尊貴議員亂噏最低時薪二十蚊吖嘛。
講開又講，香港其實有另一個屠宰中心，只不過唔係專門殺雞咁解。呢嗱，名義上應該愛護動物嘅漁護署，就係一個血淋淋嘅屠宰中心。大規模捕殺貓貓狗狗唔在講，漁護署仲有一個非常之咁荒謬嘅做法，竟然屠殺受保護動物。
唔信？睇睇呢單畸屎。冇耐之前，水警喺大嶼山破獲走私案，檢獲空運抵港嘅一百八十條五爪金龍巨型蜥蜴，總值六十九萬，一名男子被捕。漁護署發言人先係搖頭晃腦咁話，五爪金龍屬於受保護動物，受到香港法例管制。轉個頭啫，漁護署又話嘞，經過檢驗之後，發覺全部一百八十條五爪金龍健康情況欠佳，必須人道毀滅。大佬，病咗啫，唔使殺吓話？更何況，功夫茶打死都唔信一百八十條五爪金龍咁巧合全部病到五顏六色冇得救。所以話啫，漁護署其實係一個冷血到極嘅屠宰中心。
閒話講完，言歸正傳。如果活雞屠宰中心真係泡湯，當初乖乖交出牌照嘅雞販咪做咗傻仔？算唔算畀周一嶽賣咗豬仔？人哋諗住疊埋心水走去活雞屠宰中心打工，點不知一場遊戲一場夢。
點都好啦，功夫茶有一個卑微願望，議而不決十二年嘅紀錄破一次好喇，唔好破完又破呀，好樣衰o架。