明知不可為而為之，可以話係勇敢，亦可以話係戇居。一項政策未出爐已惡評如潮，民怨沸騰，當局仲夾硬死撐，咁叫做擇惡固執，係百分百嘅戇居。
環境局月底會向立法會提交停車熄匙條例草案，雖然劣評如潮，但環保署有位高官尋日仲死撐話，草案嘅豁免措施已經顧及到車輛運作、市民需要同埋運輸業界嘅訴求。
有聽眾質疑措施容易引起爭拗，增加執法難度，亦有的士司機建議，遇到炎熱潮濕天氣應該豁免停車熄匙。但高官回應話，加入天氣豁免會令法例名存實亡，仲話當局考察過實施同類法例嘅加拿大多倫多，相信執法方面唔會有問題喎。
功夫茶幾乎以為自己聽錯，世界咁大，當局度度唔比較，居然將香港同加拿大比較，簡直九唔搭八。係人都知加拿大地廣人稀，空氣清新，即使係夏天，氣溫高極有限，而且十分乾燥；香港夏天氣溫閒閒地三十度以上，又熱又濕，兩個地方相差十萬八千里，點比較吖？更何況，多倫多喺酷熱或嚴寒天氣可以豁免，香港點解唔學？
明知衰咗仲要死撐，咪叫做擇惡固執咯。講真，停車熄匙一提出已經是非多多，唔止運輸業界反對，好多市民亦認為，當局只不過係因為保護環境不力，藍天白雲愈叫愈走，為補鑊而做騷啫，根本係多此一舉，唔單止無助改善空氣質素，反而擾民，添煩添亂。
好簡單，點樣執法就係一個大問題。當局承認有關豁免措施令執法難度高咗，不過就話一樣搞得掂喎，又話計劃請多十八個交通督導員，實施時仲會有足夠培訓同清晰指引。不過亦唔排除法例實施初期會先警告，後執法。
咪玩喇！呢頭係威係勢強推停車熄匙，嗰頭就附加一大揸「豁免」、「寬限」，仲以工作量增加為由大肆擴軍，咁咪即係又要納稅人埋單。一條法例搞到唔三唔四、唔湯唔水，都唔知究竟為乜。
呢嗱，停車熄匙唔止擾民，連執法人員都頂唔順。淨係要記住啲豁免措施、寬限範圍已經頭都爆，仲要金睛火眼實啲車輛有冇熄匙同埋有冇乘客，萬一搞錯，唔止有排拗，隨時交都有得打。唉，睇怕日後執法人員個個都要隨身帶個秒錶至得咯。
再講吖，司機睇到交通督導員，早就踩油走人啦，唔通等住食「牛肉乾」咩。唔通真係要學狗仔隊咁，匿埋燈柱後面玩「偷拍」？執法執得咁鬼祟，交通督導員變咗狗仔隊，你話咁嘅法例係咪唔衰攞嚟衰吖。
當局話喎，路邊停車釋出嘅廢氣，會對行人及店舖造成滋擾，令熱島效應進一步惡化。計功夫茶話齋，如果當局罔顧民意，一意孤行推出停車熄匙擾民惡法，唔止熱島效應無法改善，民怨積聚，「爆煲效應」隨時出現添吖！