想做立法會議員？原來話都冇咁易，又唔使參選拉票，又唔使當選掟蕉，簡直易如反掌。呢嗱，你去買一個象徵立法會嘅「立」字車徽掛喺車頭，咁就可以招搖撞騙㗎喇！
咦咦咦，咪住先，立法會雖然話近年形象唔係咁好，尊貴議員連粗口都噏得出，開會瞌眼瞓更加係家常便飯，不過始終都叫做神聖不可侵犯吖，「立」字車徽真係可以隨意買賣嘅咩？功夫茶本來都係半信半疑，之但係睇過呢一單畸屎之後，疑團盡消咯。
即係咁，有市民發現一架藍色平治跑車，非法停泊喺鵝頸橋，即係灣仔軒尼詩道同堅拿道東交界嘅雙黃線禁區。非法泊車本來冇乜特別，奇就奇在車頭掛滿非常醒目嘅徽章，包括立法會嘅「立」字車徽。你知啦，普通老百姓亂咁泊車已經唔啱，如果係立法會議員，更加令人覺得係知法犯法濫用特權。於是乎，呢一位古道熱腸嘅好市民就向本報投訴嘞。
既然收到投訴，記者自然鍥而不捨追求真相，一查之下，發覺車主既唔係現任議員，亦唔係過氣政客。簡而言之，車頭掛「立」字車徽嗰位仁兄同立法會非親非故完全無關，純粹係一個家底相當豐厚嘅路人甲。記者問佢車徽點得番嚟㗎，佢話喎，買嘅囉。
唔係議員居然可以掛一個「立」字車徽通街走，有乜嘢問題冇呀？可以完全冇問題，亦都可以非常之咁大問題，視乎車主係好人定係壞蛋。大家不妨發揮一下想像力，假如車主係一個無視法紀嘅爛鬼車手，橫衝直撞左穿右插累人累物，唔知內情嘅一定會Ｏ晒嘴咁話，嘩！堂堂立法會議員亂咁開車草菅人命呀！
話時話，「立」字車徽冇規管嘅咩？阿貓阿狗都可以掛來掛去嘅咩？立法會內部指引係咁講嘅，只有現任議員有權購買有關車徽，並且只能用於議員已向立法會秘書處登記嘅車輛；之不過咁，議員落選或離任後毋須退還車徽，議員私下將車徽轉讓或轉送他人亦冇罰則，一般市民使用車徽原則上唔算違法。一句講晒三個字：無王管。
警方態度好少少，話會積極跟進今次事件，運輸署就搞笑嘞，署方發言人話喎，一般而言車徽等相關物件並不影響車輛結構或行車安全，毋須經運輸署事先批准。既然係咁，即係乜嘢古靈精怪嘅車徽都可以掛喺車頭啦，功夫茶忽發奇想，不如整一個「１」字車徽掛喺正常車牌上面，如果有人認為係冒認警隊一哥，狡辯嘅理據就係，喂，運輸署話過唔影響車輛結構或行車安全就得㗎喇！
講下講下，冒認權貴其實一樣可以照辦煮碗喎，想扮政務司司長就掛個「ＣＳ」車徽，想扮財政司司長就掛個「ＦＳ」車徽，諸如此類，不勝枚舉。
好心相關部門諗諗辦法堵塞漏洞啦，如果有人夠膽死掛個軍用車徽扮解放軍，咁就真係該煨咯！