正所謂，人衰行路打倒褪，政務司司長唐英年近排都黑仔咯，可以話係頭頭碰着黑。
硬銷政改方案咩，唐唐居然口快快將「顧全大局」講做「顧全大陸」，簡直就係鬼拍後尾枕。參觀上海世博咩，唐唐大駕光臨視察香港館，哈，好衰唔衰喺城市最佳實踐區遇到瘀爆場面，智能顯示屏居然失靈。或者就係因為太黑仔啩，所以港大民意調查顯示，政府官員支持率全線下跌之餘，唐英年係跌得最面懵懵嘅一個，跌四個百分點變咗只有百分之四十二，支持率創咗上任以來嘅新低。
唐唐嘅黑氣幾時先至結束呢？講真，癱瘓歐洲嘅冰島火山灰都唔知幾時塵埃落定啦，鬼知唐唐頭殼頂上面飄來飄去嘅黑氣幾時煙消雲散咩。唯一可以肯定嘅係，支持率創新低呢家嘢絕對有望再下一城，因為今次港大民意調查係四月七至十二日做嘅，即係政府發表政改方案之前。你知啦，呢份循環翻叮嘅方案完全唔討好，收視率極低，收貨率更低，功夫茶夠膽同你賭一蚊，下次民調必然會顯示，作為政改推銷員嘅唐英年支持率進一步急挫！
既然政府官員支持率全線下跌，曾蔭權又跌成點呢？係插水式吖，係ＰＫ式吖，定係跳樓式？民望評分下跌一點八，以五十點七分創咗去年十一月初以來嘅新低。至於支持率咯喎，明顯下跌四個百分點，反對率就上升三個百分點至百分之四十九，係上任以來嘅新高。一來一回，一高一低，煲呔曾家陣嘅民望淨值係負十五個百分點。換言之，輸到凸一凸，淪為負資產。
唉，民望又低，支持又少，唔怪得曾蔭權一早講定「民望於我如浮雲」啦，事先張揚唔稀罕吖嘛。
之不過咁，民望就話可以裝聾扮啞當做浮雲啫，民怨又可唔可以置諸不理呢？理論上係得嘅，但係隨時會付出沉重代價。譬如話，歷史上好多昏君漠視民怨，結果憤怒百姓揭竿起義推翻政府，一個唔好彩，政權敗家仔仲要送上斷頭台。千祈唔好以為功夫茶靠嚇，根據中大另一項調查顯示，香港已經確定為一個「不和諧社會」，四分之一市民同意以激烈手法抗爭，百萬怒民有機會做出非理性行為。
呢嗱嗱嗱，民怨同民望其實係有好大關係o架，百姓民怨少咯喎，官員民望咪高囉。可惜，今時今日嘅香港並唔係咁安和樂利，而係民怨沸騰爆到嘔血嗰隻，試問跌完又跌嘅官員民望有乜法子止血？
唔係講笑o架，中大調查嘅結論係，香港瀕臨暴動邊緣。喂，搵唔到食梗係怨啦，買唔起樓梗係怨啦，失驚無神跳個刻薄議員出嚟提議最低時薪賤價二十蚊，梗係怨啦。唔好唔記得，醫療事故多如牛毛，生勾勾送去醫院隨時死枯枯轉送殮房，怨唔怨先？都未計反高鐵一役揭露八十後年輕人原來係咁猛火。
講到尾，功夫茶都唔係好稀罕曾浮雲政府嘅民望，比較關心嘅係，麻煩官員生性少少，唔好再令民怨升溫，冇人想見到香港暴動o架，唔該！