防撞欄斷估 駕駛者心寒

撞車呢家嘢,有時可以好大鑊,亦都可以小兒科。功夫茶最欣賞嘅就係外國一級方程式賽車嘅設計,砰砰磅磅撞到溶溶爛爛,車就變咗一堆全世界最昂貴嘅廢鐵,人居然生勾勾爬番出嚟向觀眾揮手。聽講,賽車設計師落足心機研究防撞技術,盡量做到車毀人不亡。

防撞呢家嘢,有時可以好神奇,亦都可以攞你命。功夫茶又睇過一啲紀錄片,外國公路嘅防撞欄簡直勁到嘆為觀止,一架車兜口兜面炒過去,成條防撞欄徹底報廢。大家可能會問,徹底報廢都話勁?冇錯,的而且確真係勁,因為防撞欄首要任務係壯烈犧牲拯救世人,徹底報廢嘅意思係話防撞欄幫人做替死鬼,撞擊力卸得八八九九,人咪唔會甩皮甩骨斷手斷腳囉。

好嘞,睇番香港公路嘅防撞欄,到底係好神奇吖,定係攞你命?講出嚟嚇到你猋冷汗,原來香港普遍採用嘅幾款防撞欄,以前從來冇實地做過任何撞擊測試,政府只係根據外國數據一味斷估。換言之,防撞欄嘅實戰表現係冇人知嘅。路政署話就話終於肯為四款舊式防撞欄進行撞擊測試,之但係,該署事先講到明,無論測試結果如何,現有舊欄一概不換。

唉,身為駕駛者嘅你,聽到咁罔顧人命安全嘅官腔,係咪會覺得非常心寒?你知啦,以往發生過幾單懷疑防撞欄攞命事件,如果話舊欄一概不換,萬一發生交通意外真係好鬼死牙煙㗎!

防撞欄有兩個大忌:第一,撞極唔爛;第二,一撞即散。○四年喎,任職大專講師嘅準新郎鄭展鴻,駕駛私家車沿屯門公路往九龍,喺汀九一個彎位失控撞向三波板防撞欄,鐵欄末端好似利劍咁插入車廂,司機當堂爆頭死亡。好明顯,呢一類係撞極唔爛嘅防撞欄,救人變咗殺人,所以死者家屬告上法庭,律政司後來決定庭外和解,向鄭家賠償損失。

至於乜嘢叫做一撞即散呢?咁就要睇番○三年屯門公路嘅巴士大車禍,當時一列長約十五公尺嘅防撞欄冇辦法攔得住巴士去勢,結果成架巴士好似斷繩笨豬跳咁直墮山坡。

另外咯喎,前幾日之嘛,又有一架電單車途經上水粉嶺公路失控撞欄,司機懷疑頭部猛撼欄杆上面凸出嘅角鐵慘死。

汽車會副會長江日雄就話嘞,近年汽車馬力愈來愈大,舊式防撞欄未必有足夠抵禦能力,當局應該及早檢討及測試,並且盡快更換不合時宜嘅欄柵。香港汽車工業學會會長李耀培批評,政府一直只講不做,從來冇決心改善防撞欄設計,家陣進行撞擊測試僅作參考,缺乏全盤更換計劃,質疑測試只係門面工夫。

講咗咁耐,容許功夫茶苦口婆心講多句,各位司機大佬大姐大老爺,香港防撞欄物似主人形,同有斷估冇痛苦嘅路政署一樣靠唔住,記住小心駕駛,千祈唔好亂撞!