相信大家一定睇過老夫子漫畫，呢套充滿港人同胞集體回憶嘅經典漫畫經常會出現咁嘅荒謬情節——
老夫子造咗一間屋，不過唔記得開一道門。
老夫子造咗一艘船，不過船廠設於陸上，冇辦法落水。
老夫子造咗一架車，不過製成品原來係冇轆嘅。
如果大家認為老夫子創意無限純粹搞笑，咁就大錯特錯嘞，因為荒謬情節其實係有真人版㗎。譬如話，食環署造咗兩個殘疾人士公廁，不過竟然冇輪椅通道！
你知啦，有頭髮冇人想做瘌痢，有手腳冇人想用義肢，殘疾人士通常有必要利用輪椅代步，否則象徵殘疾嘅標誌唔會係一個人加一個轆。既然叫得做殘疾人士公廁，係咪應該鋪設「無障礙通道」呀？即係話，廁所通道唔可以係一級一級嘅樓梯，一定要係平滑坦途。
呢嗱，食環署可能睇得老夫子漫畫太多，渾身上下都係荒謬細胞。上環樂古道有一個殘疾人士廁所，同區磅巷亦有一個，最近甚至動用四百四十萬元翻新，點不知翻新嘅結果係「人有三急有障礙」，包圍廁所嘅係樓梯或者石壆，輪椅客望而生畏。
唔知大家點諗，功夫茶就覺得係唔多好笑嘅黑色幽默，設施原意明明係造福殘疾人士，可惜得物無所用，反而極盡挖苦之能事。你會唔會送一盞燈畀失明人士吖？唔會吖嘛。你會唔會送收音機畀失聰人士吖？唔會吖嘛。假設有人不幸地斷咗一對腳，如果你送一對鞋作為禮物，你祖宗十八代絕對不得安寧！食環署戇居居送兩個此路不通嘅廁所畀殘疾人士，擺明就係欺人太甚。
大家可能會有大同小異嘅經驗，人有三急通街搵廁所，辛辛苦苦終於搵到嘞，誰不知門口戙一塊牌寫住「維修暫停」，嗰一種不得其門而入嘅悲憤簡直比死更難受，甚至有當眾出醜嘅失禁危機。同樣嘞，殘疾人士去到公廁見到樓梯，等於戙一塊牌寫住「閒人免進」，一褲都係嘅危機感肯定驚心動魄。
食環署有乜嘢解釋呢？佢哋話喎，樂古道公廁只適合「非輪椅殘疾人士」使用，而廁所外面嘅樓梯不屬於該署管轄範圍。至於運輸署，佢哋嘅解釋係公廁設計階段冇人要求該署提供參考意見，基於地理限制亦難以改動。
唉，真係愈來愈似耐人尋味嘅老夫子，一個二個都係聰明笨官。設計殘疾人士公廁居然冇諗過照顧輪椅使用者，照咁講，設計醫院係咪不必考慮照顧病人？或者咁睇啦，食環署同運輸署其實都有殘疾，而且同屬「非輪椅殘疾人士」，因為殘廢嘅器官係腦部，所以一舉一動癡癡呆呆。
咦咦咦，沙田市中心巴士總站亦有騎呢設計，雖然有鋪設失明人士引路徑，不過最終會導人撞欄！
計功夫茶話齋，最好學足老夫子警惡懲奸痛打死飛仔，搵人畫幾條聰明笨官引路徑，統統將佢哋導向一失足成千古恨嘅鱷魚潭！