唔講唔知，原來喺香港做車主，無論係揸架「錢七」，或者係揸架超級跑車，大家用嘅油完全冇分別，即係等於綜援人士同超級富豪居然食同樣嘅食物，真係奇哉怪也！
不過咁，食同樣嘅食物，當然要付出同樣嘅價錢。呢嗱，本港所有油公司只提供辛烷值九十八以上嘅98無鉛汽油，冇其他選擇，但消委會調查發現，全港超過六成車種其實可以用辛烷值較低嘅95無鉛汽油，呢種油既唔會影響車輛表現，亦無損引擎，價錢就平咗約百分之五。換句話講，原來油公司一直強迫所有駕車人士用貴油。
依家油價愈來愈貴，駕車人士仲要被剝奪選擇權，焗住用貴油，小數怕長計，都咪話唔肉赤。奇就奇在，喺大部分歐美國家以及日本、新加坡甚至台灣，油公司都會提供唔同汽油畀消費者選擇，只有香港油公司獨沽一味冇得揀，簡直豈有此理。
香港話就話奉行自由市場經濟，估唔到消費者入油居然一啲自由都冇，真係匪夷所思。查實，消委會十年前已經發現，當時全港大部分車輛可以用95無鉛汽油，但政府就將責任推畀油公司，話佢哋唔肯引入低辛烷值汽油。有油公司試過引入，不過跟手又以高級汽車車主唔滿意呢種油嘅表現為由放棄，市場又變番只賣一種貴價油。
弊在港府翹埋雙手乜都唔做，任由油魔撳住搶。粗略估計，全港有二十萬架私家車因為咁被迫入貴油，十年嚟無喇喇要畀多二十億元。港府闊佬懶理，同夾埋油公司一齊打劫車主有乜分別？
消費者之所以冇得揀，完全係因為港府縱容油魔壟斷。市場缺乏競爭，油價好容易畀人操控，受害嘅係全港車主。弊就弊在，保障消費者權益嘅《競爭條例草案》一拖再拖，到依家都未交畀立法會審議，即使通過，最快都要明年至生效。
冇計啦，喺保障消費者權益方面，港府從來都係闊佬懶理。嗱，講番油價呢筆，由於當局監管不力，油公司永遠都係「加快減慢」、「加多減少」。國際油價上升咩，佢哋反應迅速，拿拿聲將零售價提高；國際油價下跌咩，佢哋又好似食咗幾擔豬油咁，慢過慢動作。大家仲記得舊年運輸業界發起嘅「餓死油魔」行動嗎？當局唔做嘢，業界惟有自己維權，你話係咪荒謬吖。
《競爭條例草案》遲遲唔落實，唔怪得最近有調查發現，港府喺提供公平競爭方面，同問責制、改善貧富懸殊及房屋政策一樣，都係「肥佬」。其實點止肥佬，簡直係交白卷喇。唉，始終都係嗰句，靠呢個政府維護消費者權益，蚊都瞓、蛇都死啦！