有冇聽過「自力更生巴士團」呀？講緊唔係成棚人逼埋一架車嘅鴨仔團，而係專車包接包送，就算得一兩個人都照樣成行嘅免費超級豪華團，經營呢間「愛心旅行社」嘅，就係洗腳唔抹腳嘅港府嘞。
其實，呢個團正名叫「自力更生」計劃，係社會福利署嘅傑作。該署聲稱要鼓勵領取失業綜援人士出去搵工，自食其力，安排佢哋參與同環保有關嘅社區工作，逢禮拜二、三、四開工。為咗吸引多啲人參與，署方專門派大型旅遊巴接載佢哋返工放工，連外出食飯亦有車接送。
招呼咁周到，睇怕爆晒棚嘞啩？唉，你咁諗就錯晒喇。本報記者跟蹤追擊發現，參與者原來只有小貓三、兩隻，以其中一日為例，可以載五十人嘅社署專車，全程司機連乘客只得七個人，由沙田去到大埔，沿途呢度停吓，嗰度等吓，有啲地方等咗廿分鐘都冇人上車，卒之用咗成粒鐘至去到林村許願廣場。到咗開工地點，搬吓盆栽，移吓椅櫈，跟住就食晏，又係專車接送。全日合計，上下晝加埋做唔夠五粒鐘就收工，由旅遊巴送返指定地點落車，拜拜係咁先。記者另外喺葵涌同銅鑼灣追訪參與「自力更生」計劃人士工作，見到嘅情況亦相差無幾。
成架旅遊巴上面得小貓三、兩隻，山長水遠走一轉，落車係咁意搬吓嘢，執吓垃圾，做幾粒鐘就收工，計落連油錢都蝕埋，參與環保變咗製造廢氣破壞環保。咁就叫鼓勵搵工？咁就叫自力更生？計功夫茶話齋，呢啲叫阿公貼錢遊車河，社署搵納稅人笨就真。
統計數字顯示，本港領取失業綜援人數過去三年有增無減，由○七年嘅三萬一千二百幾人，上升到舊年嘅三萬四千六百幾人。「自力更生」計劃有冇效，連小學生都知答案啦。話時話，如果唔係有關計劃規定，無故臨時缺席者可能被扣減失業綜援金額，參與人數可能仲少，旅遊巴分分鐘得番個司機嘅咋。
計劃推出初期，係就係幾踴躍，經常都有四、五十人參加，但後來買少見少，縮到依家得番幾丁人，社署唔去檢討計劃成效，亦唔作適當調整，一樣係出動五十人旅遊巴，你話係咪倒市民米吖？
港府做嘢唔經大腦，閉門造車，搞埋咁多計劃，十居其九不切實際，得啖笑。就講番協助綜援受助人重投社會，除咗「自力更生」計劃，仲有乜嘢「欣曉計劃」同「走出我天地」，可惜同樣係有姿勢冇實際，最終成功就業率分別只得三成同四成，與投入嘅資源根本唔成比例。
冇計啦，呢個涼薄政府平時對民間疾苦不聞不問，等到民怨爆燈就臨急抱佛腳，求其做場大龍鳳敷衍市民。做騷不惜工本，成本效益唔使計，橫掂納稅人埋單，就算倒貼都冇所謂。嗱，呢個就係以民為笨嘅特衰政府喇！