香港近日被台灣網民選咗做佢哋最討厭嘅城市，除咗唔鍾意食物好貴外，仲話香港人態度惡劣。咁又係，近年接二連三爆出港人喺台灣殺人、偷鮑魚、做租霸嘅醜聞，台灣人眼見香港不斷對佢哋進口人形垃圾，唔嬲就假！而最新嘅垃圾之唔係啱啱喺台灣播獨、大肆宣揚「五獨」思想、人稱「戴妖」嘅戴耀廷囉。
係人都知，佔中催生港獨，搞到香港雞犬不寧，成日煽惑年輕人搞搞震嘅佔中搞手戴妖，早兩日仲同埋港獨小學雞游蕙禎去咗台灣出席論壇，會合「藏獨」、「疆獨」、「蒙獨」、「台獨」等分裂國家嘅「五獨」代表圍爐取暖。戴妖仲分享乜嘢「維權運動」嘅經驗喎，實則咪又係發噏風。現場所見，台下唔止得小貓三幾隻咁大把，唔少人更加陶醉喺自己嘅手機世界當中，當戴妖透明，難得呢位「港獨」分子依然樂此不疲，仲大放厥詞話北京好快會倒台，包括香港在內嘅各地人民應該思考成立「獨立國家」定「聯邦」政府喎。
戴妖係咪喺度講緊棟篤笑呀？究竟佢係從中國嘅軍力、經濟實力、風水，定係先人報夢得出北京好快會倒台呢個睇法？佢仲叫人諗定成立「獨立國家」定「聯邦」政府，真係可以話同「違法達義」一樣歪理連篇，吹水唔抹嘴，「五獨攻心」搞到語無倫次。作為所謂嘅法律學者，佢當然知道根本冇國家會允許領土被分裂出去，無論係西班牙嘅加泰羅尼亞，英國同蘇格蘭，獨立人士通通被主權國強烈反對甚至武力鎮壓。戴妖唔去為反中亂港者撐腰嘅外部勢力國家播獨，反而喺香港、台灣搞搞震，絕對係居心叵測，冇好帶挈喇。
講到尾，戴妖之所以大言不慚，都係因為背後有特衰政府嘅司法保護傘庇護，佔領之亂落幕至今三年有多，包括戴妖在內嘅九名主要搞手依然未被法律制裁，金主漢奸黎更係逍遙法外，畀着喺西班牙煽惑民眾搞獨立嘅普伊格蒙特，早就面臨通緝令，搞到要着草啦，尋日仲被捕添，邊似得戴妖咁依然可以來去自如，唔係喺大學誤人子弟，就係去台灣妖言惑眾，展露佢嘅狐狸屁股吖！
話時話，國家多次表明對港獨嘅態度係零容忍，律政司縱容包庇戴妖等一眾佔中搞手，變相助長港獨分子得寸進尺，即係等於同國家政策打對台啫，一旦追究起上嚟，戴妖等一眾搞手固然要上身，以為玩縱容包庇好過癮嘅港英餘孽官員都隨時一身蟻嘅咋！
都係嗰句喇，戴妖有過鼓吹年輕人去佔中，但就叫自己仔女唔好去嘅前科，香港唔少年輕人當日就因為聽咗佢支笛，走去違法達義，搞到家陣着咗草有之，踎緊監嘅亦有之，對住呢啲五獨攻心、妖言惑眾嘅人渣敗類，總之就避之則吉啦！