新年流流，人人都講送舊迎新，不過國泰航空就反其道而行，竟然購入咗五架二手老爺機，仲準備嚟緊擺喺日本同新加坡呢啲熱門航線服務乘客添，以國泰近年久唔久就出亂子嘅往績，加上「全新」老爺機隊，真係冇辦法唔令人大感嘩然，有關注組織指國泰「淪落」到要買二手機，擔心服務質素下降，到底咁做係服務乘客定整蠱乘客，你諗你嘞！
但凡有留意新聞都會知道，曾經係香港航空業界金漆招牌嘅國泰航空，早已變成「因管理不善在全球最佳航空公司排名榜中節節下跌嘅國泰航空」，簡稱「因航」，不但唔再係香港之光，反而變成香港之恥。最新笑話係向來標榜每五年換一次機、懶巴閉咁款嘅國泰，竟然打破自己傳統，向阿聯酋航空購入五架機齡達十五至十六年嘅波音客機，雖然機齡比起高麗航空嗰啲五十年老爺機仲差一截，但國泰今時唔同往日，唔買新機轉去買二手機，為求慳皮無所不用其極，服務質素令人擔心。
唔係嚇你，國泰今次購入嘅同款機種，前年試過因為起落架故障，以機腹「硬着陸」降落時爆炸起火，嗰次就神仙保佑，機上逾三百名乘客及機組人員冇乜冬瓜豆腐，但意外嘅嘢一次都嫌多，老爺機帶嚟嘅安全隱患仍然要拭目以待，但國泰啱啱先喺上月公布嘅全球航空公司安全排名插水式下跌，由連續三年嘅第一位急插落到第十二位，點到乘客唔擔心吖。
之不過國泰面對跌出安全排名十大，竟然唔係積極諗計改善服務，挽回聲譽，而係一邊耍賴皮話人哋調查欠透明，一邊厚住面皮，自己摑自己，引入老爺機，唔怪得乘客紛紛用腳嚟投票，講到明「會考慮其他航空公司」。梗係啦，反正搭廉航都係坐二手機啫，可能仲冇咁受氣添，起碼航班延誤都唔使畀國泰嗰啲作為補償嘅過期餐券玩殘，更加唔似得國泰咁頻繁地出現引擎故障，甚至連機內傳出異味都試埋，搞到要call消防喺地面戒備，點止掃興咁簡單，直情係九霄驚魂喇！
有乘客仲喺國泰姊妹公司港龍航空嘅飛機餐托盤上「野生捕獲」龍精虎猛嘅「小強」，真係唔只飛行安全令乘客擔心，就連機內清潔都令乘客搖頭，不過呢啲嘢事出必有因，事關早年國泰高層錯誤決策炒燶期油蝕到攤攤腰，開唔到源就惟有諗縮數節流，大幅裁減前線員工不特止，連機艙清潔次數都縮埋皮，有乜辦法唔機艙變身曱甴屋吖！
其實國泰個朵已經好似當日被剔出恒生指數成分股咁，喺乘客心目中都被剔除咗出嚟，一月份嘅乘客運載率比去年同期下跌只係序幕咋，殘機加延誤加故障，再咁落去，真係搵曱甴搭咯！