尋日「驚蟄」打小人，鵝頸橋一片「噼噼啪啪」之聲，特首林鄭同財爺波叔今朝早醒番，肯定成塊面都係鞋印。不過計功夫茶話齋，大家「打」高官千祈千祈記得要「補漏拾遺」，唔好少咗律政司司長僭建驊嗰份吖！
呢嗱，壹淫媒老闆漢奸黎舊年六四涉嫌辱罵兼刑事恐嚇本報記者，律政司拖足九個月都冇動作不特止，仲Hea覆本報提出嘅八條質問，本報補多七條問題，追問案件進展，包括點解未起訴，有咩新進展；幾時決定係咪檢控，以至檢控時係咪有政治傾向等，到底律政司會唔會又玩拖字訣，一味龜縮？係要本報效法十二金牌召岳飛嘅故事吖，抑或要市民發揮集體念力，一齊掟西瓜落海，高官至肯蒲頭？
講到口水都乾嘞，成單畸士案情簡單，證據確鑿，漢奸黎對住記者怒吼「×你老母×」、「我實會搵人搞×你」、「我影×咗你嘅相」，有圖有片為證，吟詩都吟唔甩。律政司死都唔肯告，無非又係藉口一大籮，咩檢控需時處理吖，咩要睇證據係咪可以喺毫無合理疑點嘅標準下支持控罪吖，總之就係通篇官腔廢噏！
有人就講得啱嘞，律政司滿口虛話，擺明係放煙幕，帶市民遊花園！大家有眼見，律政司係要落Charge嘅，理得夠唔夠料，一樣二仔底死跟，好似年前嘅陳志雲案咁，律政司係都要打到去終院，結果敗訴收場，千幾萬公帑掟落鹹水海；至於證據呢家嘢，對於律政司嚟講更加係運用之妙，存乎一心，漢奸黎被指係佔中最大黑手及金主，司法當局以「證據太多，需時分析」歎慢板；到處理漢奸黎政治黑金案，又以「檢控證據不足」為由放虎歸山，神又係佢，鬼又係佢，問你服未。
所以話，本報追加嘅七條問題，答案其實已經寫在牆上。就講「律政司檢控時係咪有政治傾向」呢一條，明眼人都睇到司法保護傘唔單止對漢奸黎保護周全，對啄食佢狗餅嘅走狗政客亦係投鼠忌器；相反對住愛國愛港者就勢兇夾狼，檢控效率快過打針，加上「假髮黨」積極配合，由掟漢奸黎豬雜嘅民間義士，到執行職務嘅七警及朱Sir，全部都一身蟻，就係咁解。
冇計喇，家陣林鄭為咗谷民望大吹和解風，加上鄭若驊一上台就僭建醜聞纏身，其身不正，無以正人，對以漢奸黎為首嘅洋奴賣港賊大玩包庇放生，當中有冇唔見得光嘅政治交易，畫公仔唔使畫出腸喇啩。
一句講晒︰忍一時得寸進尺，退一步變本加厲。港府顛倒黑白，敵友不分，只會助長反中亂港者氣燄，令愛國愛港者寒心，香港亂上加亂，到頭來盞自己攞嚟衰嘅咋！