不認不認還須認，香港大學喺國際上的確有一定地位，事關外國有本講述人類怪誕行為嘅書話：「二十多歲男性大學生最能預測、最熟悉又最經常考慮嘅，莫過於性問題！」果然，呢所香港最高學府近排又爆性醜聞嘞！
嗱，港大利希慎堂繼去年八月迎新營「失禮死人」冒犯已故教授後，呢個堂口又嚟料。同一個迎新活動之嘛，竟然有男生喺眾目睽睽之下涉嫌非禮女新生，狼死得佢吖，好彩女事主喺在場同學一方有難、八方支援下力保不失咋。不過最離譜係學生會不但冇將事件向舍堂匯報，就連迎新報告都隻字不提，擺明欺上瞞下，臭屎密冚喇。如果唔係紙包唔住火，醜聞終於喺校內曝光，舍監轉介大學紀律委員會跟進，肯定永無水落石出之日都似。
講起港大迎新營，都可以話係沒有最cheap只有更cheap，玩親都係核突當有趣嘅低級遊戲，例如男女新生梅花間竹組成「人形蜈蚣」，又或者要女生踎喺地下用口接住男生夾喺大髀支水樽射出嚟嘅水，愈玩愈淫，愈玩愈賤。你知啦，家陣大學生小學雞化，心智唔成熟嘅新生會唔會喺遊戲之中忘掉輕重，以為可以為所欲為地「問妹何所欲，問妹幾時裸體共宿」，又或者重演四名港大男生用陽具拍打同學頭部、二十多人集體向一名幹事會參選人下體滴蠟之類嘅欺凌行為，真係冇人講得埋，港大管理層隻眼開隻眼閉，咪即係助長淫風！
講真，就算迎新活動唔玩淫賤，港大亦一樣失禮死人。講番新生喺已故教授弔唁冊塗鴉呢筆吖，無聊又無恥，激起社會震怒根本係自己攞嚟。雖然有聲音話迎新活動就係要有一種「蝦薯文化」喺裏面，即係對人Harsh、苛刻咁解，之但係攞一個德高望重嘅已故教授開玩笑，反映嘅唔止係港大學生對人苛刻，直情係連做人嘅基本禮貌都冇囉。
睇見都眼冤，港大近年醜聞長爆長有，最高學府淪為最淫學府，校譽蕩然無存，皆因「違法達義」歪理累事！本來寧靜嘅校園，因為「戴妖」之流嘅教師不務正業，誤人子弟，加上部分學生無心向學，醉心街頭，一味搞風搞雨為所欲為，納稅人嘅血汗錢就係咁畀呢班不學無術嘅師生嘥完再嘥，畀呢個廢柴政府同無能校方玩到透。睇到喇，大學唔止對新生Harsh，對納稅人仲Harsh吖。
古人話：「知止而後有定，定而後能靜，靜而後能安，安而後能慮，慮而後能得。」可惜吖，今時今日嘅大學失道失德，大學生做嘢完全唔經大腦，早就將古時大學之道拋到九霄雲外咯。