尋日有環保組織舉辦活動，透過熄燈一小時喚起市民關注環保，計功夫茶話呢，律政司若果再唔將反中亂港嘅壹淫媒老闆漢奸黎落鑊提告，香港法治熄燈，前途都係一片黑暗吖！
有市民尋日就唔忍心睇住香港沉淪落去，遊行去咗中環律政中心示威，除咗沿途高叫「黑金黎未落鑊」、「律政司有內鬼」、「司法姑息養奸」、「捐巨款推佔中，黑金黎最賤格」，仲拉起「涉違法佔中及恐嚇記者，促律政司快檢控黎智英」嘅橫額，炮轟律政司三番四次放生漢奸黎，要求律政司司長鄭若驊唔好徇私枉法咁話。
市民大眾唔放心香港司法制度未來，唔係無緣無故嘅，事關鄭若驊個老頂林鄭近排想吹大和解風想創咗個心，唔止出席啜飲漢奸黎奶水嘅白鴿黨晚宴，仲做埋另類黑金金主，示範點樣豪捐三萬港元，接替咗正陷財困嘅漢奸黎班，事後仲以「大和解」嚟為呢件荒謬絕倫嘅事塗脂抹粉，再加上之前漢奸黎、長毛等人喺政治黑金案全身而退，「雙學三子」喺暴力衝擊政總案逍遙法外，擺明有內鬼包庇，林鄭仲要「大和解」上腦，市民唔擔心就奇啦！
只怪特衰政府內嘅港英餘孽身在漢營心在曹，買咗漢奸黎背後嘅外部勢力怕，所以律政司對住漢奸黎唔敢做亦唔敢告，漢奸黎上年喺「六四集會」上，以「×你老母×」、「我實會搵人搞×你」、「我影×咗你嘅相」刑恐本集團記者嗰單畸士，有圖有片證據確鑿，但律政司拖咗九個月都未提出檢控，佔中嗰筆更加係提都唔提，連市民都睇得出律政司心中有鬼兼身邊有鬼，所以一味對漢奸黎為首嘅反中亂港者姑息養奸，面對住本報三度去信質詢，律政司更係一味龜縮，唔係講虛話、放煙幕，就係話「沒有進一步補充」。計功夫茶話齋，律政司與其逃避現實，倒不如醜婦終須見家翁，揪出無間道，如果唔係，市民要求律政司清除內鬼嘅遊行示威只會陸續有嚟，可以避得幾多次呀？
話時話，律政司冇盡好維護香港法治嘅責任，唔止對住洋奴漢奸放軟手腳，就連對住黃賭毒黑樣樣齊兼引入南亞兵團禍港嘅黑幫和勝和前坐館「上海仔」郭永鴻，都係軟手軟腳，上海仔五年幾前捲入洗黑錢案，到依家都未被落鑊，換着係愛國愛港者犯事早就被極速檢控，呢啲係咪欺善怕惡，欺軟怕硬，大家有眼見。
都係嗰句，林鄭妄想搞大和解，律政司盲從配合，為洋奴漢奸撐起司法保護傘，法治都可以攞嚟出賣嘅，香港有乜辦法唔愈來愈黑暗？