開講有話，有錢唔係萬能，無錢就萬萬不能。好似港府坐擁金山銀山，但就守財奴上身，對民生疾苦一味闊佬懶理，今年財政預算案派糖不均又拒絕派錢，更加搞到怨聲沸騰。好彩大慈大悲嘅觀音菩薩憐貧惜弱，年年開庫派錢，永不落空，香港人多少有啲希望。
呢，每年正月廿六係觀音開庫日，人人都可以向觀音借錢，次次吸引善信大排長龍。尤其係紅磡觀音廟，今年更加墟冚，有市民紮營三晚為霸頭位，更加有外國人慕名而來。係呀，觀音大士救苦救難，出手慷慨，最多可借十億，最少也有三千萬，而且不分種族，不論膚色，不管貧富，求者必應，咁先至係「利民紓困」、「關愛共享」吖嘛！
千祈咪以為觀音開庫下下幾千萬、幾億咁借出去好誇張喎，其實港府庫房一樣咁豬籠入水，足夠政府二十七個月嘅開支，有人話港府窮得只剩下錢，就係咁解。之不過縮骨政府偏偏死命攬實荷包，善財難捨，搞到本港嘅貧窮問題不斷惡化，幾年前係七個港人一個窮，家陣係五個港人一個窮，窮人總數高達一百三十多萬，問你點頂。
仲有喎，觀音借庫比預算案嘅「補漏拾遺」措施更加體察民情，起碼唔會將你左秤右秤，搞一大輪先批畀你，只要肯借肯還，任何人都可以問觀音借完再借，好心呢個拒人千里嘅港府同有求必應嘅觀音學吓嘢，咁先係「民為貴」嘅為政之道。
講到尾，香港嘅貧富懸殊問題之所以冠絕全球發達經濟體，全因港府無能兼涼薄。預算案唔還富於民，走去還富於富，加劇貧富懸殊，近年喺快餐店度宿嘅無家者人口不斷上升，絕對係政府資源錯配嘅政策所造成，與其泵三億畀海洋公園，等一萬個幸運兒得到入場券，又或者搞埋啲幫倒忙嘅代交DSE考生考試費，倒不如直接將錢用喺幫助社會基層、弱勢社群身上仲實際。
話時話，升斗市民營營役役，無非求餐安樂茶飯食，咁卑微嘅願望都無法實現，直情係港人嘅悲哀，港府嘅恥辱。一項最新調查顯示，香港喺亞洲最適宜外派員工居住地點排行榜上排第二十八位，再次跌出頭二十五名之列，同獨佔鰲頭嘅新加坡根本無得揮。大公司外派人員都覺得香港不宜居，住劏房籠屋嘅本地無殼蝸牛就更加水深火熱喇。
都係嗰一句，官僚靠得住，豬乸會上樹。觀音借庫一年比一年熱鬧，即係港府孤寒、基層貧困嘅寫照，難為特首林鄭仲話喺扶貧方面好有成績喎，知唔知醜字點寫o架！