未入正題前，功夫茶想同大家研究吓烏龜呢種生物。烏龜長壽，係吉祥高貴嘅象徵，漢唐嗰陣，官位唔夠高係冇資格佩戴龜形飾物嘅。但到咗元朝就唔同晒嘞，烏龜唔再高貴，仲被視為無恥之物，衍生出縮頭烏龜、龜頭龜腦、縮手縮腳等貶義詞添。
嗱，香港正正有個烏龜人辦：此人身居要職，理應地位高貴，偏偏做事縮手縮腳，畏首畏尾，唔敢告又唔敢做，正一縮頭烏龜。係呀，呢個咪就係手執刑事檢控大權嘅律政司囉。
大家都知，違法佔中搞到香港雞毛鴨血，身為律政司，係咪好應該撥亂反正呀？係咪好應該將佔中嘅罪魁禍首漢奸黎落鑊呀？可惜吖，律政司一直拖拖拉拉，應告唔告，唔應告偏去告，落親鑊嘅唔係魚毛蝦仔，就係盡忠職守嘅警察，令人見識乜嘢叫「違法變合法，執法變犯法」。尤其係鄭若驊其身不正，一上場就被揭發僭建，萬箭穿心，結果不旋踵就向反對派跪低投誠，宣布放生漢奸黎單政治黑金案，佔中嗰筆更係提都唔提，死未。
即係咁，官字兩個口，律政司話政治黑金案「證據不足」喎，但舊年「六四」漢奸黎眾目睽睽之下爆粗辱罵兼刑事恐嚇東方記者嗰單畸士，有圖有片，鐵證如山，唔係「證據不足」喇啩？應該做嘢喇啩？點知事隔九個幾月，律政司一直唔提出檢控，東方先後三次去信質詢唔檢控嘅原因，第一次換來大堆虛話、煙幕、廢話，答完等於冇答；第二次一句「冇進一步補充」就睬你都傻，係咪吹脹先？
睇到喇，有大大把司法保護傘護體，漢奸黎唔變本加厲打橫行至奇。早前東方記者到壹淫媒大樓外正常採訪，漢奸黎就派出兩名手下阻礙東方記者拍攝，大聲叫囂兼郁手郁腳。東方報警後，本月中第三度去信質問律政司，點知到家陣都冇回覆，擺明龜縮喇。喂，堂堂律政司，乜都唔使做、唔敢告，唔通淫媒漢奸就大晒？正義傳媒就好蝦啲？到底呢個係乜嘢社會呀？仲有冇王法o架？
不過咪話律政司淨係包庇漢奸黎，查實對住黑幫頭子一樣龜縮。人稱「上海仔」嘅和勝和前坐館郭永鴻，黃賭毒黑樣樣齊，五年幾前捲入洗黑錢案被捕，之後又涉及多宗嚴重刑事罪行，着草多時前年終於再度落網，點知律政司又係玩拖字訣，到家陣都未落佢鑊，唔通鄭若驊生肖真係屬龜嘅？
講到呢度，功夫茶既心痛又憤怒，香港自詡法治之區，偏偏今日法治淪喪，暗無天日，有能力嘅市民走夾唔抖。呢嗱，近年移民人數屢創新高，問吓律政司就知點解嘞！