紙係包唔住火，玩火嘅人遲早被火燒後欄，好似壹淫媒老闆漢奸黎涉嫌辱罵兼刑事恐嚇本報記者單畸士，律政司死拖爛拖九個月，唔敢告亦唔敢做，就算本報上月去函提出八條質問，律政司依然聞唔到(火羅)味，Hea覆當覆咗，本報忍無可忍，再度去函提出七條問題，若然律政司又再扮鴕鳥，香港法治只會好似神枱桔咁，喺佢所謂嘅把關下慢慢被陰乾！
雖則律政司司長上任時信誓旦旦，話要維護香港法治，實情係點大家有眼見，漢奸黎以「×你老母×」、「我實會搵人搞×你」、「我影×咗你嘅相」等粗言辱罵兼刑事恐嚇本報記者，過程有圖有片，證據確鑿，案情又簡單，搞乜遲遲唔起訴？案件有咩最新進展？將會幾時起訴？咪畀人睇死，呢三條難度只係入門級嘅簡單題目，律政司都會搬出大堆藉口當做錦囊使用，答非所問，試圖蒙混過關。
換着係答案選項只係是與非嘅「五十五十」題目，應該會易答啲喇啩！案件拖延係咪對當事人唔公平？係咪有人包庇漢奸黎？係咪代表本港司法制度淪陷？愛國愛港團體屢被針對，反中亂港者就頻頻獲司法保護傘放生，律政司檢控有冇政治傾向？你估律政司嘅最後答案會唔會又係閃爍其詞吖嗱？
講真，去信律政司換來嘅唔係已讀不回，就係Hea覆當覆咗，一句處理案件「需要時間」，就關人個關。睇嚟只有以愚公移山、精衞填海嗰份鍥而不捨嘅精神，先可以頂得住律政司千篇一律嘅官樣文章，想到古有十二道金牌召岳飛，本報要討回公道，難道要發足十二封信律政司至肯認真回覆？抑或照樣回番十二個神枱桔，就算係履行咗維護香港法治嘅職責？咁又有乜辦法唔令香港法治倒退，市民對政府信心盡失？
常言道歷史不斷重演，岳飛當年眼見外有金人入侵，內有秦檜搞風搞雨，香港家陣何嘗唔係面對住外部勢力入侵，內部漢奸黎反中亂港，港英餘孽暗中放水，之所以出現咁烏煙瘴氣嘅局面一啲都唔奇吖，皆因林鄭要吹大和解風，對住有外部勢力撐腰嘅漢奸黎自然畏首畏尾，連帶啄食漢奸狗餅嘅一眾政客亦都同樣得到司法保護傘嘅庇佑，反觀愛國愛港者稍有行差踏錯就被拉被告，送入監倉，作為討好枱底交易對象嘅籌碼。
「反中亂港就呃Like，愛國愛港就PK」就係家陣香港嘅寫照，連法治都因為搞大和解而被出賣，律政司點解遲遲唔敢覆信，又或者覆都係Hea覆，講到底就係心中有鬼。