香港本月尾將首度舉行「國際發呆大賽」，功夫茶呼籲律政司有料唔好嘥，就算已經截止報名，都不妨以「好忙、警覺性不足」為由，同賽會打個招呼插隊參加，事關「香港發呆王」呢個諢名，律政司認第二，冇人敢認第一！
呢嗱，就講壹淫媒老闆漢奸黎粗言辱罵兼刑事恐嚇東方記者，乜嘢「×你老母×」、「我實會搵人搞×你」、「我影×咗你嘅相」，簡直無法無天，激起全城怒火。好嘞，事件拖延超過八個月，律政司不但未提告，更係龜縮零回應，就算本報正式去函提出八條提問，又或者多位立法會議員先後質詢，律政司一樣繼續扮鴕鳥，繼續發呆放空。咪以為維持呢種咁Hea嘅狀態係人都得，實則面皮薄啲都頂唔順，試問邊有人咁厚顏無恥，Hea覆當回覆，虛應當回應，咁有發呆王風範先得o架！
係咁嘅，本報上月向律政司提出八大問題，律政司拖延多時終於回覆嘞，弊在又係舊調重彈，話案件需時處理喎，對於會否檢控漢奸黎隻字不提，答咗等於冇答，又一次示範講空話、放煙幕嘅賴皮伎倆，吹脹！
唔係咩，問你案發至今八個月仍未檢控係咪唔合理，係咪玩包庇，結果唔係答非所問，就係閃爍其詞。喂，件案大大話話拖咗八個月，警方早就完成調查，仲要有圖有片有真相，咁都仲話需時處理，處理足「一萬年」好唔好？
嗱，有立法會議員舊年九月已去信時任律政司司長袁國強要求跟進，得到嘅都係錄音機無限Loop洗腦式回覆，滿以為律政司司長換咗人會有新氣象喇，結果又係Hea覆無限次，唔怪得社會各界都頂佢唔順，直指事件打擊政府威信，令市民對司法失去信心，辣爆直斥律政司一味死拖爛拖，連市民嘅信心都畀佢拖到冇得剩吖。
有一本講述拖延心理嘅書係咁講嘅：「拖延，唔係時間管理出咗問題，而係內心恐懼在搗蛋！」，「恐懼」呢兩隻字真係中到應一應！如果律政司司長鄭若驊屋企冇僭建，就唔需要恐懼有人死咬唔放；如果港府唔係驚咗外部勢力，漢奸黎就唔可以作威作福，也文也武。有人話漢奸黎有司法保護傘兼免死金牌，睇吓律政司放生完佢單政治黑金案，又對呢單恐嚇記者打壓新聞自由嘅畸士視若無睹，就連佔中嗰筆都大有不了了之之勢，真係唔到你唔信吖。
咪畀功夫茶批中，林鄭大吹和解風，律政司放生漢奸黎就係當中嘅枱底交易嘞，可惜呢筆交易係將法治當成籌碼，以犧牲本港核心價值作為代價，邊個係千古罪人，大家心中有數喇！